Máis de 800.000 doses da vacina contra a gripe para a campaña que durará do 12 de outubro ata fin de ano
Haberá 900 puntos de vacinación, entre os que se atopan centros de Atención Primaria, residencias ou centros de menores e discapacitados.
Por Europa Press / Redacción | SANTIAGO DE COMPOSTELA | 26/08/2020 | Actualizada ás 18:07
O presidente da Xunta, Alberto Núñez Feijóo, anunciou este mércores que, nun contexto sanitario marcado pola pandemia do coronavirus, a Administración galega "redobra o seu esforzo" contra a gripe e contará con 865.832 dose de vacinas, unhas 200.000 máis que na campaña do ano pasado.
Feijóo explicou que a campaña empezará o próximo 12 de outubro e estenderase ata final de ano, cunha duración de 12 semanas.
Haberá 900 puntos de vacinación, entre os que se atopan centros de Atención Primaria, residencias ou centros de menores e discapacitados.
O obxectivo, segundo avanzou o presidente, é cubrir ao 75 por cento da poboación maior de 65 anos, ademais doutros colectivos de risco.
