Os prezos das exportacións aumentan un 2,7% en xuño en Galicia e os das importacións diminúen un 0,8%

Os prezos das exportacións aumentaron un 2,7% en xuño en Galicia en relación co mesmo mes do ano anterior, mentres que os das importacións diminuíron un 0,8%, de acordo cos datos que publica este luns o Instituto Galego de Estatística (IGE).

Por destino económico, produciuse un incremento interanual do 6,73% nos prezos das exportacións de bens de consumo. Os dos bens intermedios baixaron un 2,58% e os dos bens de capital retrocederon un 1,28%.

En canto ás importacións, os prezos dos bens de consumo creceron un 0,88% respecto de xuño de 2019. Os prezos dos bens intermedios experimentaron un descenso interanual do 1,64% e os dos bens de capital reducíronse un 4,54%.

Mentres, segundo destino xeográfico, o ascenso interanual foi do 4,15% nos prezos dos bens exportados aos países da Unión Económica e Monetaria, do 3,54% á Unión Europea e do 2,99% ao OCDE. Os bens con destino ao resto do mundo tamén subiron, un 0,17% respecto de xuño do pasado exercicio.

Por orixe dos bens importados, os prezos dos procedentes de países pertencentes á Unión Económica e Monetaria baixaron un 2,5%, os da Unión Europea caeron un 2,05% e os do OCDE, un 4,18%. Pola contra, repuntaron un 7,21% os prezos das importacións do resto do mundo.

Evolución dos prezos das importacións e as exportacións galegas. IGE | Fonte: Europa Press