Demandan que Inditex faga probas da COVID a "todo o persoal dunha tenda" cando rexistren un positivo

A CIG demanda que, ante a aparición dun caso positivo de covid-19 en calquera das tendas do grupo Inditex, a empresa faga probas PCR a todo o persoal "ou, polo menos, a todo o persoal da quenda co que compartiu espazo a persoa contaxiada durante o últimos catro días".

A presidenta do comité de Zara, Carmiña Naveiro, advirte de que "non se pode limitar o rastrexo ás persoas que tiveron o contacto máis directo, porque se comparten espazos comúns (baños, despachos de billetes, cociña ou zonas de descanso)" e engade que a transmisión do virus pódese dar a través das superficies "e non só polo aire".

A demanda da central nacionalista responde, segundo apunta nunha nota de prensa, a un recente caso de positivo nunha tenda de Lefties "onde Inditex se limitou a facer as probas a dúas das compañeiras directas da persoa afectada".

Segundo indica Naveiro, a compañía "cinguiuse ao que di o protocolo do Sergas", pero "un grupo como Inditex non pode escatimar para facerlle as probas ao seu persoal aínda que vaia máis aló do previsto por Sanidade".

Para o persoal, é "importante" porque "suporía ir traballar cunha garantía e, sobre todo, coa tranquilidade de que non se pon en risco nin a saúde nin á clientela".

Unha muller con máscara pasa xunto ao escaparate dunha tenda Zara. Europa Press