Os sindicatos de profesores piden concreción en recursos humanos despois dos cambios no protocolo da Xunta
A folga de profesorado mantense, de momento, para o 10 e 16 de setembro.
Por Europa Press / Redacción | SANTIAGO DE COMPOSTELA | 01/09/2020 | Actualizada ás 18:33
Os novos cambios introducidos pola Xunta no protocolo para o inicio do curso suscitou opinións diversas entre os representantes dos docentes. A pesar de que os sindicatos valoran a rectificación e a reacción do Goberno galego, botan en falta unha maior concreción tanto na disposición de medios e de recursos humanos para garantir o cumprimento dos criterios e directrices de seguridade ante a COVID-19.
De feito, CIG e CC.OO referíronse ao manexo dos tempos por parte da Consellería de Educación para anunciar a publicación do documento. Suso Bermello, de CIG, insistiu en que a Xunta adiantou seis días o anuncio do texto, tres días despois do rexistro da convocatoria de folga e unhas horas tras detallar en rolda de prensa o calendario de mobilizacións polo inicio do curso.
É por iso que consideraron que "o rexeitamento das familias e a presión social están detrás" da decisión da Xunta, que na súa opinión representa "unha rectificación en toda regra", sobre todo ante o cambio do distanciamento na aula (de 1,5 metros entre cadeiras), e a posibilidade de realizar desdobres cando o espazo impida cumprir coas medidas de seguridade.
"Esta é a medida que pedimos insistentemente desde o principio do estado de alarma e que significará unha baixada efectiva de cocientes", destacou o sindicato, quen á súa vez matizou que de momento descoñecen "a incidencia real" desta acción e a dotación de medios que realizará a administración galega.
Luz López, de CC.OO., tamén coincidiu en valorar que o cambio de rumbo "é unha reacción á convocatoria" de protestas impulsada por estes dous sindicatos, STEG e CSIF, aínda que "totalmente insuficiente", posto que infantil e primaria mantense a previsión inicial dos 'grupos burbulla'.
Así mesmo, "seguen sen facer avaliacións de risco", que sería "o que marcaría o aforamento de cada aula" e a distancia de seguridade necesaria.
A folga de profesorado mantense, de momento, para o 10 e 16 de setembro. CIG considerou que a folga e as concrentracións convocadas son "máis necesarias que nunca", e que teñen por diante unha "loita que debe intensificarse" en próximos días, posto que o alcance das novas medidas son "desiguais" en función do nivel educativo.
RECUPERAR O DIÁLOGO
Felipe Balboa, de FeSP-UGT, considerou que "se está concretando" a acción no ámbito hixiénico-sanitario, pero advertiu de que "falta todo o organizativo e de recursos humanos", posto que o cambio na distancia "vai obrigar á Xunta a realizar contratacións ao amparo do fondo COVID".
"Non lles vai a quedar máis remedio", engadiu, e instou á Administración a "recuperar o diálogo" que rompeu coa presentación do primeiro protocolo para as aulas do mes de xullo.
Finalmente, Julio Díaz, de ANPE, insistiu tamén en que "aínda queda moito por falar" e pediu que se aclaren os recursos que se van a incrementar como consecuencia dos cambios anunciados e se existirán materiais informáticos para os estudantes con problemas de conectividade e que necesitarán medios de teleformación, ademais de reiterar a súa petición de que se dote de servizos de enfermaría aos centros.
