Por E.P. | SANTIAGO DE COMPOSTELA | 02/09/2020 | Actualizada ás 19:40
O Ministerio de Transportes, Mobilidade e Axenda Urbana adxudicou o contrato de obras da ligazón orbital de Santiago de Compostela, que unirá a AP-9 coa autovía A-54, o aeroporto e Lavacolla e os polígonos industriais. En concreto, adxudicouse por un importe de 19,1 millóns de euros.
Segundo precisou o Goberno central a través dun comunicado, o obxectivo desta actuación é definir unha nova conexión entre a autoestrada AP-9 e a autovía A-54 (Lugo-Santiago), así como co aeroporto Rosalía de Castro e os polígonos industriais e comerciais do norte da cidade, Tambre e Costa Vella, con todos os movementos posibles.
As obras consistirán na construción dunha nova ligazón no quilómetro 64,5 da AP-9, resolto mediante unha glorieta superior sobre o tronco da autoestrada e catro novos ramais. A ligazón conectarase coa actual glorieta de San Marcos na A-54.
Así mesmo, executarase un novo carril de trenzado (quilómetro 66) entre os vehículos que se incorporan sentido A Coruña ao tronco desde a ligazón Santiago Norte, cos vehículos que saen desde a AP-9 cara á ligazón 0rbital.
Esta nova ligazón permitirá desconxestionar tráficos da actual saída de Santiago Norte (quilómetro 67) da AP-9 en horas punta, onde conflúen tanto os tráficos que se dirixen cara ao centro cidade como os xerados polos polígonos industriais.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.