O Goberno seguirá os pasos de Iglesias e dará baixas ós pais de fillos con PCR negativa
Así o confirmou a Ministra de Traballo, Yolanda Díaz, logo de que Pablo Iglesias corrixira a María Jesús Montero.
Por E.P. | SANTIAGO DE COMPOSTELA | 03/09/2020 | Actualizada ás 12:16
A Ministra de Traballo, Yolanda Díaz, confirmou que o Goberno traballa nunha baixa por incapacidade temporal para os pais que teñan que coidar de fillos en corentena que non desen positivo nas probas PCR. "No que se está traballando é na extensión de baixa por corentena mesmo no caso dun menor que non esta contaxiado, o que é unha incapacidade temporal por corentena indirecta", indicou Díaz nunha entrevista en IB3 recollida por Europa Press.
Esta posibilidade foi anunciada xa este mércores polo vicepresidente segundo e ministro de Dereitos Sociais e Axenda 2030, Pablo Iglesias, un día despois de que a ministra portavoz do Goberno, María Jesús Montero, se referira exclusivamente ás baixas para pais con fillos contaxiados que tivesen que gardar corentena e ao programa 'Cóidame' para traballadores con fillos con PCR negativa que teñan que permanecer en illamento.
Precisamente, sobre o plan 'Cóidame', Yolanda Díaz reiterou a vontade do executivo de prorrogalo máis aló do 22 de setembro e asegurou que pedirá "prontitude" aos axentes sociais na negociación "para dar certezas á xente". A titular de Traballo enxalzou as características deste programa que cualificou de "histórico" porque "xamais na historia da lexislación laboral deste país se permitiu un dereito de preferencia do traballador para que elixa a adaptación da súa xornada e mesmo unha redución de ata o 100 por cento".
Así mesmo, lembrou outras medidas para a protección dos traballadores adoptadas polo Goberno como consecuencia da crise sanitaria como as baixas por incapacidade temporal para aqueles empregados que "se teñan que cuarentenar cunha protección do 75 por cento". "A día de hoxe todos os traballadores do noso país teñen este mecanismo á súa disposición", concluíu Díaz.
