Rego sinala que os PGE deben "recoller as partidas necesarias" para cumprir o acordo de investidura

O portavoz do BNG no Congreso destacou que "non houbo información concreta" por parte de Pedro Sánchez sobre "cal vai ser a orientación" do PGE de 2021, "máis aló das referencias xenéricas a que serían orzamentos progresistas".

Por Europa Press / Redacción | SANTIAGO DE COMPOSTELA | 03/09/2020 | Actualizada ás 19:29

Comparte esta noticia

O deputado do BNG Néstor Rego trasladou este xoves, durante a súa reunión co presidente do Goberno, Pedro Sánchez, na rolda de contactos para os Orzamentos Xerais do próximo ano, que estas contas deben "recoller as partidas necesarias" para garantir o "cumprimento estrito" do incluído no acordo de investidura que alcanzou cos nacionalistas galegos.

"O BNG cumpriu a súa parte, e o PSOE ten que cumprir a súa parte", dixo Néstor Rego, que lembrou que este non é un compromiso en exclusiva con este partido, "se non con Galicia".

Do mesmo xeito, Rego mostrouse partidario de que estas contas xerais se pacten con "as forzas da esquerda soberanista que apoiaron a investidura" de Sánchez, entre elas o BNG, xa que "dificilmente uns orzamentos apoiados polo PP ou por Ciudadanos van ser progresistas".

Durante a reunión, dixo, "non houbo información concreta" por parte de Pedro Sánchez sobre "cal vai ser a orientación" do PGE de 2021, "máis aló das referencias xenéricas a que serían orzamentos progresistas". "Pero para iso é necesario apoiarse nas forzas progresistas", resolveu.

CORONAVIRUS

A maiores, no encontro, Néstor Rego trasladou ao presidente do Goberno a súa preocupación pola evolución da pandemia de COVID e, de forma particular, ante o próximo inicio do curso escolar, xa que "nin o ministerio nin as comunidades adoptaron as medidas necesarias para garantir a seguridade dos nenos".

Entre elas, o deputado do BNG mencionou a redución do cociente de alumnos por aula e a contratación de máis profesorado. Ademais, reclamaron que os pais de escolares que vexan os seus centros pechados "poidan acceder a un permiso retribuído para poder conciliar" e non só aqueles cuxos fillos estean contaxiados.

O deputado no Congreso polo BNG, Néstor Rego.POOL - Europa Press
O deputado no Congreso polo BNG, Néstor Rego.POOL - Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta