A Deputación da Coruña pon en marcha un plan para unha "volta segura" aos seus centros de ensino
O presidente do organismo provincial, Valentín González Formoso, destacou que "para lograr unha volta ás aulas a máis segura posible é imprescindible a colaboración de todos os axentes implicados: institucións, profesorado e alumnado".
Por E.P. | A CORUÑA | 04/09/2020 | Actualizada ás 19:03
A Deputación da Coruña puxo en marcha un plan para a "volta segura" aos seus centros de ensino, segundo informa o organismo provincial.
O presidente do organismo provincial, Valentín González Formoso, e a responsable de Educación, Sandra González, abordaron esta cuestión nunha reunión cos directores dos centros educativos dependentes do organismo: IES Calvo Sotelo, IES Puga Ramón e o Conservatorio de Danza.
Ampliación de horarios, reforzo dos servizos de limpeza e contratación de máis persoal docente son algunhas das principais medidas, "que serán máis estritas na residencia e comedor do Calvo Sotelo, onde haberá controis de temperatura dos residentes, comida envasada individualmente e habitacións para posibles illamentos preventivos", explica.
Valentín González Formoso destacou que "para lograr unha volta ás aulas a máis segura posible é imprescindible a colaboración de todos os axentes implicados: institucións, profesorado e alumnado".
