Por Galicia Confidencial | Vigo | 26/03/2013 | Actualizada ás 18:34
Soberanistas, marxistas, antiglobalizadores, ecoloxistas e socialistas. Todos eles teñen lugar en AGE baixo diversas siglas --FPG, Encontro Irmandiño, Ecosocialistas, FOGA...-. E, agora, xorde outro colectivo da unión de dúas pequenas formacións; Nova Esquerda Socialista (NES) e de militantes de Unidade da Esquerda Galega (UEG), ademais dun grupo de persoas independentes e grupos de activistas sociais.
Este novo partido, que leva o nome de Nova Esquerda Galega (NEG), celebrou o seu Congreso Constituínte esta fin de semana en Vigo, a cidade da que son boa parte dos seus militantes. Nesta cónclave abriuse un proceso de reflexión sobre a situación da esquerda social en Galicia e valorouse a necesidade de impulsar un novo polo da "esquerda transformadora e revolucionaria" no interior de Anova.
Confluencia con outros sectores
Tamén se falou sobre o actual escenario de crise económica e sistémica, a situación dos movementos sociais en Vigo (e en Galicia), o contexto político que envolve a Anova ou as perspectivas de futuro de Alternativa Galega de Esquerda (AGE). Ademais, abordaronse as posibilidades de confluencia de diferentes sectores militantes nunha única organización e valorouse a posibilidade de traballar na apertura de Nova Esquerda Galega a outros colectivos sociais e políticos. "Analizouse a necesidade de continuar traballando nas distintas áreas de actividade social e política: desafiuzamentos, problemas veciñais, comercio ambulante, política municipal, ecoloxía, dereitos humanos, movemento sindical,...", sinalan desde este novo colectivo.
A Comisión Permanente e Executiva Nacional de NEG queda integrada por Xosé Manuel Graña (Presidente), Lois Pérez Leira e Óscar Lomba Álvarez (Voceiros e Coordinadores Xerais de NEG. Ademais serán os responsabeis de Organización, infraestructura, loxística, administración e finanzas), Luis Rolando (Secretario de documentación, proxectos e programas), Fran Riveiro (Secretario de Prensa, Propaganda e Comunicación) e Carlos Carminati (Secretario de movementos sociais, veciñais e participación cidadá).
Os impulsores
Precisamente, os dous voceiros e coordinadores xerais de NEG, Pérez Leira e Oscar Lomba, foron os grandes muñidores deste novo colectivo. O primeiro é o principal dirixente de Nova Esquerda Socialista e o segundo un dos grandes impulsores de Unidade da Esquerda Galega, un colectivo que xurdiu con militantes do PSdeG que abandonaron esta formación polo dirixismo co que Abel Caballero controla ao socialismo en Vigo.
Esta nova formación ten un Consello POlítico Nacional con 13 secretarías e unha importante área internacional con presencia en Arxentina, Cuba, Brasil e Uruguai.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.