Detención para quen acose políticos
Interior ordena á Policía identificar para sancionar e deter a quen "exerza actos de frustigamento e acoso a membros de partidos". Os conservadores queren parar as protestas das hipotecas e das preferentes. O alcalde de Moaña, do PP, únese ao peche.
Por Galicia Confidencial | Santiago | 29/03/2013 | Actualizada ás 12:16
O PP aumenta a presión sobre os colectivos cidadáns que se manifestan publicamente contra as políticas conservadores. Os afectados polas preferentes e os activistas contra os desafiuzamentos deben ter en conta que a Secretaría de Estado de Seguridade acaba de enviar a orde de identificar e deter aos que "exerzan actos de frustigamento contra membros de partidos políticos".
"Contra os que exercen actos de fustrigamento e acoso a membros de partidos políticos, sedes de partidos, etc. Procederase en primeiro lugar a identificar para sanción os que participen nestes actos, conforme á Lei de Seguridade Cidadá ou ben, se se tratará de actos constitutivos de delito procederase á detención das devanditas persoas conforme á lexislación vixente" di textualmente a orde remitida ás comisarías esta semana.
A presión sobre os políticos do PPdeG disparouse nas últimas semanas. As quitas das preferentes e a sentencia da UE que declara ilegal parte da lexislación española en hipotecas deron folgos ás plataformas de estafados e aos activistas anti-hipotecas.
Superado polo impacto mediático, o PP primeiro tentou criminalizar aos que protestan contra os desafiuzamentos -vinculándoos coa contorna etarra. Agora, o Ministerio do Interior, gobernado polos conservadores, ordena aos axentes que identifiquen, propoñan para sanción e, no seu caso, deteñan a aqueles que participen en iniciativas como os 'escraches'.
En Galicia xa houbo unha detención dun mozo que participou na ocupación -na que houbo incidentes- dun pleno en Ponteareas. Ademais, esta semana en desaloxouse por vez primeira un pleno por parte das forzas de seguridade, en Sanxenxo.
Síntoma do dano que están a causar as preferentes ao PP é que o alcalde conservador de Moaña non só apoia as mobilizacións, senón que decidiu unirse ao peche no consistorio.
