O Congreso tomba o decreto sobre os remanentes municipais

O Pleno do Congreso rexeitou este xoves convalidar o decreto lei que recolle o acordo coa Federación Española de Municipios e Provincias (FEMP) sobre a cesión dos remanentes dos concellos, que quedou derrogado.

En concreto, o texto foi tombado por 193 votos en contra, fronte a 156 a favor. O Ministerio de Facenda alcanzou a última hora un acordo cos seus socios de Unidas Podemos que permitiu o apoio dos morados e as súas confluencias, pero non logrou sumar a ningún outro grupo parlamentario.

Trátase da primeira vez que o Goberno de coalición de socialistas e morados perde unha votación sobre a validación dun decreto lei.

OPOSICIÓN

A oposición rexeitou en bloque no Congreso a "chantaxe" e o "ataque" á autonomía local que considera que o Goberno está realizado aos concellos co decreto sobre os remanentes, un decreto, din, que supón un "ataque" á autonomía local. Para o BNG, en concreto, supón unha "incautación de recursos municipais".

Por iso, practicamente todos os partidos, incluído En Comú Podem, reclamaron ao Ministerio de Facenda que presente un novo texto. "O Goberno non pode permitirse dicir que non hai segundas oportunidades", dixo Gerardo Pisarello, deputado de En Comú.

O primeiro grupo parlamentario en intervir no debate para a validación do citado decreto foi o PP, cuxo vicesecretario de Política Territorial, Antonio González Terol, xustificou a súa posición en que o seu partido non pode ser "cómplice" do que considera "o roubo do século".

Desde Vox, Iván Espinosa de los Monteros confirmou que o seu rexeitamento "ao golpe máis duro" que pretende ateigar o Goberno ao municipalismo nestes anos, a unha "chantaxe sen precedentes". En nome de ERC, Joan Margall lamentou que o Goberno apostase pola "recentralización e a austeridade" igual que o 'popular' Cristóbal Montoro e que pretenda converter aos concellos "no banco do Estado".  Desde Cs, Carmen Martínez Granados lamentou que esta vez non fose posible un acordo co Goberno, ao que acusou de "non escoitar" á oposición nin aos concellos e de tentar porlles "entre o eixo e a roda" co polémico decreto.

"O que fai falta é derrogar a 'Lei Montoro' que asfixiaba aos concellos. O Goberno debe aprender que está en minoría e só suma maioría negociando, e ser valente en cumprir as súas promesas", escribiu, polo seu lado, o deputado de Más País, Íñigo Errejón, a través da súa conta persoal de Twitter que recolleu Europa Press. Unha reflexión compartida co deputado do BNG, Néstor Rego.

CABALLERO

Pola súa banda, o presidente da Federación Española de Municipios e Provincias (FEMP), Abel Caballero, tachou de "vergoñosa" a intervención do grupo parlamentario do PP no Congreso durante o debate de validación do decreto de remanentes dos concellos e lamentou o seu "antimunicipalismo".

Nunha rolda de prensa celebrada este xoves en Vigo, o tamén alcalde da cidade olívica reprobou a "patética e vergoñosa intervención do PP" na sesión da Cámara Baixa e volveuno a responsabilizar da situación actual.

PSdeG

O PSdeG criticou a "caradura inmensa" do PP por oporse ao real decreto porque "está a xogar coa lei que eles fixeron, a 'lei Montoro'". Así o manifestou hoxe o secretario xeral do PSdeG, Gonzalo Caballero, nunha visita a Ourense, onde subliñou que "ao PP nunca lle gustou o municipalismo" e que usa agora os aforros locais "para tentar facer oposición ao Goberno", a pesar de que "o Goberno socialista está comprometido cos concellos".