Santiago presenta un plan de sustentabilidade turística dotado de 4 millóns
O primeiro dos eixos nos que se basea pasa pola 'Gobernación, estratexia e activación do sector turístico', para o que o plan calcula un orzamento de 1,3 millóns de investimento ao longo de tres anos.
Por E.P. | SANTIAGO DE COMPOSTELA | 10/09/2020 | Actualizada ás 16:12
O concelleiro de Turismo de Santiago, Sindo Guinarte, presentou este xoves as liñas básicas do Plan de Sustentabilidade Turística co que a cidade quere concorrer á convocatoria da Secretaría de Estado para este tipo de documentos, un plan dotado dun investimento de catro millóns de euros distribuídos en tres anos e en cinco eixos de actuación.
Reactivar o sector, crear novos produtos, favorecer o turismo sustentable e a economía circular, renovar a mercadotecnia da cidade ou aproveitar as novas tecnoloxías son algunhas das claves que aborda este documento, que presentou este mesmo xoves a súa candidatura á convocatoria e que deberá pasar dúas fases de avaliación, unha primeira por parte da Xunta e outra da Secretaría de Estado de Turismo.
O primeiro dos eixos nos que se basea pasa pola 'Gobernación, estratexia e activación do sector turístico', para o que o plan calcula un orzamento de 1,3 millóns de investimento ao longo de tres anos.
Neste ámbito, dixo Guinarte, traballarase na planificación e definición dunha nova estratexia turística de Santiago, baseada nun "turismo sustentable, equilibrado, seguro e responsable", que permita a "reactivación" deste ámbito tras a crise da COVID-19.
Por outra banda, un segundo eixo, dotado con 870.000 euros, pasa polo desenvolvemento de Santiago como destino intelixente, así como pola mobilidade sustentable e a mellora da accesibilidade.
Dentro disto, o concelleiro apostou por "profundar na aplicación da tecnoloxía á información ao visitante e á xestión dos fluxos turísticos", conseguindo "mellorar" estes fluxos dentro da cidade histórica.
Para iso, proponse a creación dunha plataforma de xestión do destino intelixente, a habilitación de espazos de acollida e estancia para "xestionar de maneira mais sustentable os fluxos turísticos" na cidade" e a elaboración dun plan de accesibilidade con accións como a mellora de accesibilidade da Praza de Galicia e a creación dun itinerario accesible de entrada ao Pazo de Xelmírez.
ESTRATEXIA VERDE
O terceiro eixo, dotado con 640.000 euros, abarca a cidade histórica e a 'estratexia verde' da urbe, promovendo infraestruturas verdes e "solucións vinculadas á natureza", así como "medidas de adaptación" á economía circular e contra o cambio climático.
Paralelamente, proponse intervencións na cidade histórica e accións de activación e posta en valor do patrimonio, como a renovación da iluminación no centro histórico ou a elaboración dun plan de apoio ás economías urbanas.
En cuarto lugar, o plan propón unha transición ecolóxica para o sector turístico, con iniciativas dotadas de 480.000 euros en tres anos e que buscan a mellora na xestión ambiental das empresas turísticas, a redución do impacto ambiental da actividade turística, cambios na xestión de residuos ou medidas de eficiencia enerxética.
Finalmente, un quinto eixo aposta pola renovación da mercadotecnia local e a creación de novos produtos e novas experiencias sustentables, a través dun investimento de 630.000 euros.
Este ámbito busca "aproveitar mellor" o potencial de Santiago como destino cultural e gastronómico, renovar a marca turística de Compostela ou incrementar a promoción en liña. Un dos elementos que destacou o concelleiro de Turismo neste ámbito é a creación dun Centro de Cultura Gastronómica de Galicia, para funcionar como polo de atracción na materia.
PRAZOS
O plan, de ser aprobado, contaría cun financiamento tripartito a mans da Xunta, a Secretaría de Estado de Turismo e o Concello de Santiago.
Unha vez presentada a candidatura, levará a cabo agora unha primeira fase de avaliación por parte da Xunta, durante o mes de setembro, e, posteriormente, avaliarao o Goberno central.
Prevese que a Conferencia Sectorial de Turismo anuncie as candidaturas seleccionadas nas primeiras semanas de outubro, de modo que se poidan asinar os convenios o mes seguinte e ter os fondos a inicios de 2021.
