Por Galicia Confidencial | SANTIAGO DE COMPOSTELA | 18/09/2020 | Actualizada ás 09:35
Santiago de Compostela será escenario o sábado vindeiro dunha das primeiras homenaxes literarias na era covid. O agraciado será o autor vigués Vítor Vaqueiro, poeta narrador e fotógrafo cuxa figura será ensalzada pola Asociación de Escritoras e Escritores en Lingua Galega (AELG) como parte da vixésimo sexta edición da Homenaxe ó Escritor na súa Terra.
Do acto, do cal Vaqueiro sairá como membro de honra da asociación, resulta destacable o espazo escollido, a moitos kilómetros da vila natal do autor. A selección de Compostela non é senón un xeito de recoñecer o estreito vencello de Vaqueiro coa cidade ao longo da súa extensa traxectoria, tanto profesional -foi estudante e docente na cidade- como literaria.
Así dá proba o derradeiro dos poemarios publicados ata o momento polo autor, 1968. A obra, que convenientemente saíu do prelo 50 anos máis tarde, evoca os anos de efervescencia na universidade logo do Maio francés. Estas e outras vivencias serán postas en valor e recordadas no acto pola AELG, que terá lugar no parque de Galeras da cidade e non nun espazo pechado para adaptarse o mellor posible á actual situación sanitaria.
UN MONOLITO E UNHA ÁRBORE
A xornada dará comezo ás 11:30 da mañá co descubrimento dun monolito conmemorativo e a plantación dun carballo na honra do autor. Posteriormente, e trala xustificación da entrega do premio, o poeta será agasallado cunha peza escultórica da autoría de Soledad Penalta. Tamén está previsto que interveñen unha figura do Concello, probablemente o propio alcalde.
A Homenaxe ó Escritor na súa Terra conforma xa unha "tradición" no seo da Asociación, que leva máis de dúas décadas escollendo este recurso para poñer en valor e destacar a contribución artística e literaria dos recoñecidos. "A terra escollida polo homenaxeado cobra un protagonismo fundamental", explican.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.