A Xunta di agora que a Lei Montoro "ten cousas malas"
Critica os criterios de repartición dos fondos estatais contra a covid-19, pois con eles Galicia sae "prexudicada"
Por E.P. | Santiago de Compostela | 18/09/2020 | Actualizada ás 15:02
O director xeral de Política Financeira, David Cabañó, afirmou que, "como todo nesta vida", a coñecida como Lei Montoro "ten cousas boas e cousas malas". Pola súa banda, a Xunta avoga por que o actual Goberno que preside Pedro Sánchez busque "unha fórmula", segundo dixo, para que os municipios poidan dispor dos seus aforros.
Na comisión de economía do Parlamento e ás preguntas da deputada do BNG Noa Presas sobre cal é o posicionamento da Xunta sobre esta lei e se cre que hai que derrogala, Cabañó defendeuna, a pesar do "deostada" que está, polo que supuxo para obter aforros, pero apuntou que nestes momentos o propio exministro de Facenda con Mariano Rajoy "propuxo suspender" a norma dadas as actuais circunstancias de crises pola pandemia da covid-19.
"Entendemos que os concellos que lograron reducir o seu endebedamento e un importante volume de aforro deben poder investilo en dar unha resposta social e económica a esta crise", destacou o titular de Política Financeira.
Respecto diso, apostou por "buscar unha fórmula adecuada a esta demanda" e opinou que iso é "o que debe facer un goberno, adaptarse e cambiar cando as circunstancias varíen".
"Esperemos que a derrota parlamentaria do Goberno lle faga rectificar ou recapacitar e buscar outras fórmulas que permitan a mobilización dos aforros dos concellos", incidiu, antes de apelar á "cláusula de escape" ou ata a unha "modificación da normativa".
"Como as meigas, fórmulas, 'habelas hainas", resolveu, partidario de "explorar" vías e contrario a "calquera tentativa de incautación" dos remanentes.
FONDOS CONTRA A COVID
Pola súa banda, a nacionalista Noa Presas mostrouse contraria á "incautación de fondos municipais por parte do Estado" e tamén interrogou ao alto cargo da Consellería de Facenda pola repartición de fondos estatais para afrontar a crise.
Respecto diso, David Cabañó criticou os "criterios inxustificados" para a repartición de fondos, que deixan a Galicia como "prexudicada". "Tan só cunha repartición por habitantes, Galicia recibiría un 21% máis que a media", asegurou.
