A Xunta divide en catro subgrupos o comité asesor de Educación, que non adoptará decisións sanitarias

O conselleiro de Cultura, Educación e Universidade, Román Rodríguez, presidiu este luns a primeira reunión do comité asesor que conformou a Xunta de cara ao comezo do curso no contexto da pandemia de COVID-19. Este órgano traballará dividido en catro subgrupos: organización escolar e interna dos centros, ensino virtual, inclusión do alumnado con necesidades educativas especiais e ensinos de réxime especial.

Segundo informou o Goberno galego, o conselleiro fixo fincapé durante esta primeira reunión en que, a pesar de que o gabinete educativo segue o ronsel do comité clínico para facer fronte ao coronavirus, "non vai tomar decisións sanitarias".

No entanto, agradeceu a presenza de expertos deste ámbito --entre eles, o doutor Ángel Carracedo-- porque considera "moi positivo" contar co seu asesoramento para tomar decisións educativas no actual contexto.

Román Rodríguez, que asistiu de forma telemática ao encontro ao estar en corentena desde o venres tras o positivo dun contacto próximo, comezou agradecendo aos 35 integrantes do comité a súa participación, o cal "denota un compromiso significativo".

Ademais, o titular da Consellería de Educación incidiu en que o obxectivo deste órgano é que a Xunta conte con mecanismos de asesoramento, decisión e avaliación, posto que o curso 2020/21, que xa comezou no caso de Primaria e as universidades, vaise a atopar con "moitas situacións impredicibles e descoñecidas".

"Hai que favorecer a participación e o maior consenso posible no campo educativo", insistiu Rodríguez, para seguidamente recalcou que todos os axentes implicados son "fundamentais" para que o sistema "funcione con normalidade e o mellor posible dentro da situación actual".

MEMBROS DO COMITÉ

Os 35 membros do comité, que se reunirá "coa periodicidade que a situación epidemiolóxica demande", tal e como informaba este domingo a Xunta, proceden de distintos ámbitos: desde a administración, como o propio conselleiro e o seu equipo; o sanitario, representantes de equipos directivos de centros e departamentos de orientadores e, por último, tres persoas de "recoñecido prestixio".

Así o destacou a Administración autonómica sobre a participación no comité do exdirector do Instituto Rosalía de Castro de Santiago Ubaldo Rueda, o catedrático de Medicina Legal da USC Ángel Carracedo e Vicente Docasar, catedrático de Francés no IES Daviña Rei Monforte e exportavoz de Educación no Parlamento de Galicia polo PSdeG.

En representación dos equipos directivos dos centros educativos estarán Manuel Portas (IES Xelmírez II, de Santiago), Marta Castro (CEIP Paradai, de Lugo), Alberto Silva (Centro de Educación Especial Duques de Lugo, de Santiago), Enrique Pazo (CIFP Ferrolterra, de Ferrol), Eva López Tarrío (IES Valadares, de Vigo), María Fernández (Escola Oficial de Idiomas de Pontevedra), Valentín García (CPR María Inmaculada, de Verín) e Francisco Gago (Centro Público Integrado Plurilingüe Laureano Prieto, de A Gudiña).

Pola súa banda, exercerá como representante dos departamentos de orientación Yolanda Barallobre (IES Poeta Díaz Castro), mentres que María Vitoria Fernández Mosquera (EOE da Coruña) representará os equipos de orientación específicos. Manuel Peralbo, da Universidade da Coruña, será o especialista en psicoloxía educativa.

As catro persoas que achegarán a súa visión do punto de vista do persoal sanitario especializado son Juan Gestal (catedrático de Medicina Preventiva da Universidade de Santiago de Compostela), Luís Sánchez (pediatra no Centro de Saúde de Vite, en Santiago), Pedro Rascado Sedes (especialista de UCI do Complexo Hospitalario Universitario de Santiago) e Jorge Aboal Viñas (director xeral de Asistencia Sanitaria do Servizo Galego de Saúde).

O comité complétase con Pedro Armas como representante da Comisión Interuniversitaria de Galicia (CIUG) e con Xosé Viñas (IES David Buján, de Cambre) e María Jesús Casado (IES Daviña Rei, de Monforte de Lemos), que serán os dous docentes especialistas en prácticas de innovación educativa, educación virtual e uso de recursos dixitais.