Por Europa Press / Redacción | SANTIAGO DE COMPOSTELA | 21/09/2020 | Actualizada ás 16:21
Máis de 60 expertos e consultores especializados sumáronse ao equipo técnico do Igape para apoiar, asesorar e formar aos autónomos, comercios e empresas galegas en cuestións relacionadas coa era post COVID-19.
Forman parte do Igape Responde, o programa da Xunta que activou unha liña de asesoramento gratuíto para facilitar a este colectivo a posta en marcha de medidas de acción inmediata.
O vindeiro mércores 23 terá lugar o primeiro dos encontros dixitais que inclúe esta liña, 'Como pode axudar o programa Igape Responde á miña empresa', un seminario web no que se informará dos apoios que ofrece.
A través da web responde.igape.es, o tecido empresarial galego pode acceder a 14 tipos de medidas diferentes, que se implementan de maneira rápida nun prazo de dúas semanas. O soporte inclúe, ademais, un seguimento posterior dun mes, cunha intensidade de 25 horas de consultoría personalizada por beneficiario.
Os expertos ofrecerán asesoramento en diferentes ámbitos: financiamento, negocio, operacións e persoas. No primeiro caso, as empresas poderán replanificar as súas débedas comerciais, buscar financiamento, xestionar cobros e operacións comerciais ou planificar as obrigacións fiscais. Pola súa banda, as medidas para implantar no campo do negocio ofrecen a posibilidade de reconfigurar a oferta comercial, conseguir a promoción en rede ou mesmo reorientar o negocio.
A liña inclúe un terceiro ámbito de soporte, o de operacións, que axuda a implantar o teletraballo, prestar servizos en liña ou acometer unha reorganización operativa. Mediante as iniciativas relacionadas co campo das persoas será posible reter os equipos e motivalos, acometer unha planificación laboral ou fortalecer as competencias para o novo escenario económico.
Ademais, ofrécese asesoramento de carácter xeral, orientado ás empresas que necesiten definir unha combinación de medidas de varios tipos para minimizar o impacto da pandemia no seu negocio. Entre outros resultados, as compañías poden atopar novas fontes de ingresos, captar e fidelizar novos clientes ou manter os servizos en remoto.
Xunto co asesoramento do equipo técnico do Igape e os expertos dispoñibles, a liña achegará, de maneira periódica, ás empresas e os autónomos boletíns e vídeos informativos, seminarios web e respostas ás preguntas e dúbidas máis formuladas por eles.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.