Por E.P. | SANTIAGO DE COMPOSTELA | 25/09/2020 | Actualizada ás 16:36
O concelleiro de Obras Urbanas de Pontevedra, Demetrio Gómez, anunciou este venres que o Concello da cidade do Lérez pechará ao tráfico a rúa Alfonso XIII durante o horario de recreo do Colexio Froebel, co obxecto de ofrecer ao alumnado un espazo para poder saír durante o descanso das aulas.
Este edil, que mantivo este venres unha reunión coa dirección do centro educativo, sinalou que nos centros educativos están a tomarse "medidas realmente moi radicais" que afectan á educación, ao traballo dos docentes e tamén ao desenvolvemento dos menores, "porque nalgúns casos está a haber limitacións moi graves para os xogos dos nenos e das nenas".
Neste último caso situou ao colexio Froebel, onde o alumnado debe permanecer durante cinco horas dentro da aula por carecer dun patio ao que saír.
Esta solución para utilizar a rúa como patio sería similar, segundo explicou Demetrio Gómez, á adoptada co colexio de Barcelos e a medida activarase unha vez que se complete o trámite administrativo necesario, mediante o que a Consellería de Educación cursa solicitude ao Concello para dispor dese espazo.
O peche de Alfonso XIII ao tráfico realizaríase durante o tres cuartos de hora do recreo, entre as 11,30 e as 12,15 horas, e o resto da xornada tan só quedará pechado o tramo máis próximo á praza de Concepción Arenal.
A entrada e saída de residentes quedaría habilitada pola rúa Echegaray, para o que será preciso eliminar a zona de aparcadoiro de servizos e habilitar o dobre sentido de circulación.
OUTROS PECHES
En rolda de prensa, Demetrio Gómez aproveitou para valorar as primeiras xornadas tras o peche ao tráfico da avenida da Reina Vitoria Eugenia entre a entrada ao estacionamento de Montero Ríos e a rúa Pelamios, co obxecto de facilitarlle ao centro de ensino IES Sánchez Cantón o cumprimento do protocolo Covid na entrada e saída e nas horas de descanso.
O edil asegurou que "a medida funciona correctamente, non está a dar ningún problema e non hai retencións". En canto ao funcionamento das rúas lindeiras anunciou que, a petición da veciñanza, cambiarase o sentido do tramo da rúa Palamios que sae cara á rúa Rosalía de Castro.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.