Por E.P. | SANTIAGO DE COMPOSTELA | 30/09/2020 | Actualizada ás 18:06
A Clínica Podológica Universitaria de Ferrol, situada no Hospital Naval, ofrecerá atención gratuíta ás persoas sen fogar e en exclusión social que sexan derivadas desde a área de Benestar Social deste Concello.
Esta atención formúlase a través dun convenio coa Universidade da Coruña (UDC), e que establece que setenta persoas en situación de vulnerabilidade poderán ser atendidas cada ano, tras a firma do acordo entre o alcalde, Ángel Mato (PSOE), e o reitor desta universidade, Xullo Abalde, prevista para os próximos días.
Ambos visitaron no mediodía deste mércores as instalacións sanitarias en compañía do xerente da área Sanitaria de Ferrol, Anxo Facio, a vicerreitora do Campus de Ferrol, María Jesús Movilla, e a edil de Benestar Social, Eva Martínez.
O novo convenio suporá unha achega de 5.000 euros por parte da Administración local e incluirá servizos de quiropodología, cirurxía podológica, exploración e biomecánica, ortopodología e pé de risco. Dito convenio de colaboración terá vixencia durante o curso académico 2020-2021, aínda que poderá ser prorrogado por mutuo acordo das partes ata dous cursos académicos máis.
O alcalde de Ferrol trasladou que a achega municipal supón un "investimento social" para os nosos veciños "máis vulnerables". Segundo Mato "trátase dunha prestación moi importante para contribuír ao seu benestar".
O reitor da UDC detallou que este acordo "permite que a Clínica Podológica poida seguir dando servizos e que neste caso será ás persoas que teñen maiores problemas económicos, cun servizo social máis facía a sociedade".
Ángel Facio detallou que desde a área Sanitaria de Ferrol preténdese manter a liña de colaboración coa Universidade da Coruña, coas facultades de Enfermaría e Podoloxía, ademais de con o Concello, "xa que a prestación sanitaria é un alicerce do estado de benestar e por iso todas as Administracións temos que axudar e colaborar".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.