Gonzalo Caballero reprocha a Feijóo que "antepoña intereses partidistas" e "vaia da man de Ayuso"
Os socialistas sinalan que as medidas non afectarían a ningún municipio galego, nin sequera aos que teñen "restricións da Xunta".
- A Xunta de Feijóo en contra de confinar ás cidades de máis de 100.000 con máis de 500 casos
- Aprobado "por ampla maioría" o acordo de restrición de mobilidade que se publicará nuns días, anuncia Illa
Por Europa Press / Redacción | Santiago de Compostela | 30/09/2020 | Actualizada ás 21:28
O secretario xeral do PSdeG, Gonzalo Caballero, reprochou á Xunta que "antepoña os seus intereses partidistas á protección da cidadanía fronte ao covid-19" e, neste sentido, acusou ao Goberno de Alberto Núñez Feijóo de "ir da man de Ayuso", "tentando bloquear" as medidas de contención da pandemia.
"Feijóo ten que aclarar por que prefire seguir na estratexia de confrontación do PP co Goberno de España en lugar de amparar a toma de decisións para frear a propagación do virus", sinalou Caballero, tras coñecer a postura de Galicia no Consello Interterritorial de Sanidade.
Respecto diso, os socialistas sinalan que ás medidas do Ministerio de Sanidade "só se opoñen comunidades dirixidas polos populares e Cataluña". As medidas de restrición do Goberno central afectan á mobilidade nas cidades con máis de 500 contaxios por cada 100.000 habitantes, un índice de ocupación superior ao 35 por cento na UCI e máis dun 10 por cento de positivos nas PCR. Esta situación, lembra o PSdeG, "non afectaría a ningún dos concellos galegos, nin sequera a aqueles que a día de hoxe teñen restricións impostas prol a Xunta".
"FONDAMENTE ALARMANTE"
Así as cousas, os socialistas galegos advirten de que nun contexto no que a "grave" situación de Madrid "preocupa a toda España" pola mobilidade ao redor da capital, é "fondamente alarmante" que Feijóo "prefira seguir os ditados do PP de Casado e Ayuso, antes que ampliar as medidas de contención". "Isto non é un xogo", advertiu o secretario xeral do PSdeG a través dun comunicado de prensa.
POSTURA XUNTA
A Xunta trasladou o seu rexeitamento á proposta do Ministerio de Sanidade ao considerala "incompleta" e que carece dos "avais técnicos suficientes" para adaptala á situación epidemiolóxica galega. O conselleiro de Sanidade, JulioGarcía Comesaña, criticou que a proposta unicamente contempla tres criterios de avaliación e "obvia moitos dos parámetros" recollidos polo documento elaborado polo comité clínico de expertos galego.
