A ministra Yolanda Díaz avanza que o paro rexistrou en setembro o maior descenso "desde os anos noventa e tantos"
A titular de Traballo di que non só serán bos os datos de paro, tamén os de afiliación á Seguridade Social.
Por Europa Press / Redacción | MADRID | 01/10/2020 | Actualizada ás 14:53
A ministra de Traballo e Economía Social, Yolanda Díaz, adiantou este xoves que o paro rexistrou en setembro un descenso marca, "a mellor cifra neste mes desde os anos noventa e tantos", segundo precisou. De acordo coa serie histórica, que arrinca no ano 1996, o paro subiu en todos os meses de setembro, con excepción dos anos 2005, 2006 e 2007, cando baixou en 5.824, 17.511 e 10.933 persoas, respectivamente.
A partir de 2008, rexistráronse aumentos do desemprego en todos os meses de setembro, co que o dato deste ano sería o primeiro descenso do paro nun mes de setembro desde o exercicio 2007.
Ata agora, a maior caída do paro neste mes é a de 2006 (-17.511 desempregados) e a maior suba, a de 2011, cando case 96.000 persoas pasaron ás listas do desemprego.
A ministra subliñou que non só serán bos os datos de paro de setembro, tamén os de afiliación á Seguridade Social. Ambos publicaranse mañá a partir das 9.00 horas.
O ministro de Inclusión, Seguridade Social e Migracións, José Luís Escrivá, xa avanzou onte en RNE que en setembro se crearon uns 100.000 empregos en termos medios e desestacionalizados.
Para a titular de Traballo, esta evolución supón que, se se controla a enfermidade, "as cousas van ir ben". "E ademais temos o colchón dos ERTE", lembrou.
Díaz, en declaracións a LaSexta, afirmou que é consciente de que, a pesar das boas cifras de emprego de setembro, "o sufrimento da xente é alleo a estes datos".
