Denuncian sondaxes "ilegais" para a instalación dunha nova megamina que afectaría a Santa Comba e Coristanco
Eurobattery Minerals realiza prospeccións nun área que afectaría a 22 núcleos destes dous concellos.
Por Galicia Confidencial | SANTIAGO DE COMPOSTELA | 03/10/2020 | Actualizada ás 10:00
Nova denuncia de actividades mineiras ao bordo da legalidade en Galicia. A asociación ambiental Petón do Lobo vén de facer público que a compañía Sueca Eurobattery Minerals estaría a realizar sondaxes "ilegais" na parroquia de Castriz, no municipio coruñés de Santa Comba.
Carmen é o nome do dereito mineiro sobre o que Eurobattery Minerals realiza as prospeccións mineiras na parroquia de Castriz para a busca de níquel, cobre o cobalto. Este dereito mineiro solicitado no ano 1942 e inscrito no censo catastral mineiro no ano 1944 como concesión directa de explotación abrangue 2.559.9400 hectáreas nos municipio de Santa Comba e Coristanco, na provincia da Coruña.
"O flagrante incumprimento da normativa mineira, a opacidade e falla de transparencia institucional ao redor do proxecto 'Corcel', evidencia que a postura da Xunta de Galicia é estar á beira da empresa e favorecela en todo o que poida, ata o punto de non someter a exposición pública nin os proxectos dos permisos de investigación mineira nin os plans de restauración das catas e prospeccións, nunha tramitación espúrea máis propia de Administracións corruptas e neocoloniais do pasado, que de democracias avanzadas do século XXI", denuncia.
PARALIZACIÓN
Por iso, Petón do Lobo insta ao Concello de Santa Comba e á Xunta de Galicia á paralización inmediata das prospeccións, en tanto que non someta a exposición pública o proxecto dos permisos de investigación mineira e o plan de restauración das catas.
Así, lembra que o dereito mineiro "Carmen" sobre o que traballa a empresa, caducado dende hai anos, e de máis de 2.500 hectáreas de superficie, afecta a núcleso de Santa Comba e Coristanco como os de Castriz, San Salvador, Vilartide, Vilardante de Arriba, Boaña de Abaixo, Boaña de Arriba, Boimente, A Choupana, Escanande, Estévez, Frieiro, O Hospital, A Mostaza, O Outeiro, Padreiro, Traba, Vento, Xallas, O Xesto, Castro, Choupana, ou Codeseira.
"De resultar exitosas as prospeccións é probable que a veciñanza destes núcleos non poidan convivir á beira dun proxecto industrial de mina a ceo aberto que empregará explosivos tipo A e que lles obrigaría ao éxodo poboacional", denuncia Petón do Lobo nun comunicado. Por iso, pide á veciñanza "que se organice" e demande información tanto ao concello como á Xefatura territorial de Minas da Coruña.
