Por Europa Press / Redacción | Ferrol | 02/10/2020 | Actualizada ás 17:57
O secretario xeral do PSdeG, Gonzalo Caballero, hase comprometer a "colaborar fielmente" para manter "a actividade industrial e o emprego" en Navantia e en Ferrolterra, tal e como trasladou minutos antes de manter unha reunión de traballo co comité de empresa de Navantia Fene.
Neste sentido, incidiu en que é necesario reforzar "as canles de diálogo coa nova presidenta da empresa, para potenciar unha parte do estaleiro que é fundamental para Galicia".
Ás portas da antiga Astano, estaleiro situado na marxe sur da Ría de Ferrol, o tamén deputado autonómico detallou que a actividade industrial en Navantia Ferrol e Fene "é fundamental para Galicia, onde a construción das fragatas F-110 van permitir xerar uns 7.000 postos de traballo, pero ademais hai que seguir traballando na diversificación, coa incorporación da eólica mariña, ademais do desenvolvemento do Estaleiro 4.0".
No encontro cos representantes dos traballadores tamén estiveron presentes o alcalde de Ferrol, Anxo Mato (PSOE), os deputados nacionais socialistas Montserrat García e Diego Taibo, o senador Antonio Vázquez e o deputado autonómico Martín Seco.
Gonzalo Caballero apuntou que ademais dos contratos dos buques para a Armada Española, cuxo inicio non está previsto ata o ano 2022, é necesario "buscar medidas e carga de traballo complementaria para pór desde agora mesmo todas as posibilidades do estaleiro e do emprego en activo".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.