Por Galicia Confidencial | Compostela | 04/10/2020 | Actualizada ás 21:00
O conselleiro de Sanidade, Julio García Comesaña, anunciou que a Xunta presentará a súa propia aplicación para rastrear a covid. Chamarase 'Pass Covid' e buscará "complementar" a do Ministerio, a Radar Covid.
"Presentarase en próximos días" co obxectivo de que entre en vigor "en breve, en días ou semanas", dixo nunha entrevista na RG. Tamén asegurou que a consellería traballa "nunha solución" que permita achegar aos concellos "información de forma adecuada" sobre os datos da pandemia en cada un deles, despois das últimas peticións lanzadas pola Federación Galega de Municipios e Provincias (Fegamp). Datos que, curiosamente, son publicados diariamente en determinados medios de comunicación afíns ao Goberno da Xunta sen que cheguen aos propios concellos.
Iso si, o conselleiro aseverou que "nunca" darán nomes e apelidos dos veciños infectados --só aos sanitarios--, aínda que as autoridades municipais teñan "a mellor intención" de axudarlles.
NOVAS PROBAS
Por outra banda, anunciou que "agora" parece "oportuno", coincidindo co curso escolar e a chegada do inverno, realizar "outro cribado" aos profesionais do Sergas a través de test de dobre banda. Tampouco descarta facer outro estudo de seroprevalencia para coñecer a exposición da poboación galega ao coronavirus.
Así mesmo, García Comesaña avanza que o test de saliva que "desde hai meses" se aplica na área sanitaria de Vigo --da que el mesmo era xerente-- estenderanse " a outras áreas" e realizaranse aos 15.000 traballadores de residencias sociosanitarias da Comunidade.
.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.