O Goberno central pide a Alcoa e Alu Ibérica información adicional para recibir axudas por CO2
Alcoa sería adxudicataria de axudas por 8,79 millóns de euros, mentres que Alu Ibérica recibiría algo máis de medio millón.
Por E.P. | Santiago de Compostela | 05/10/2020 | Actualizada ás 17:36
O Ministerio de Industria, Comercio e Turismo enviou senllos requirimentos a Alcoa e Alu Ibérica Avilés e A Coruña solicitando información sobre a evolución da súa produción e emprego, mes a mes, desde finais de 2018, desagregada por actividades produtivas, para confirmar que cumpren os requisitos das axudas por CO2.
A Alcoa, ademais, preguntóuselle pola súa previsión respecto ao Expediente de Regulación de Emprego (ERE) que presentou, redución de persoal e persoal final, desagregada por actividade produtiva.
A multinacional estadounidense ten exposto un proceso de despedimento colectivo que afectaría a máis de 500 empregados da súa fábrica de San Cibrao, tras o fracaso das negociacións para a venda da factoría.
O gabinete dirixido por Reyes Maroto indicou que estes requirimentos se solicitan no marco do proceso de adxudicación da convocatoria do mecanismo de compensación de custos de emisións indirectas de gases de efecto invernadoiro correspondentes ao ano 2019 e en cumprimento da regulación destas axudas.
En concreto, Alcoa, a través da sociedade Aluminio Español, sería adxudicatario de axudas por 8,79 millóns de euros, mentres que Alu Ibérica recibiría algo máis de medio millón de euros.
As empresas dispoñen de 10 días para remitir os datos solicitados no requirimento, así como para presentar posibles alegacións á proposta. Pasado ese período, o Ministerio de Industria volverá analizar a situación para determinar se se adxudican as axudas ou non.
