O PPdeG acusa o Goberno central de "atacar" a empresas galegas ao modificar o prazo de concesión de zonas marítimas

O secretario xeral do PPdeG, Miguel Tellado, acusou ao Goberno central de de "atacar" a empresas galegas ao modificar o prazo de concesión de terreos públicos en dominios marítimo-terrestres mediante o proxecto de lei de cambio climático e transición enerxética.
Nunha rolda de prensa celebrada este martes, afirmou que esta medida afecta a un cento de empresas e a 5.000 edificacións situadas en 80 concellos galegos ao carón do mar.

Por iso, Tellado avanzou que o Grupo Parlamentario Popular no Congreso presentará unha emenda ao artigo do proxecto de lei que afecta os prazos das concesións para "facer fronte a un novo ataque" á industria de transformación do mar e "blindar" o sector e os seus postos de traballo.

En concreto, o proxecto de lei do Ministerio para a Transición Ecolóxica e o Reto Demográfico expón que as prórrogas das concesións (cuxa duración máxima é de 75 anos) computen desde 1988, cando se redactou a primeira norma, en lugar de desde o momento no que se solicita a ampliación.

A ese respecto, o secretario xeral do PPdeG asegurou que este proxecto de lei supón que "non haxa unha paralización da Lei de Costas de facto" e denunciou que o Goberno retomase a formulación da mesma "faltando ás súas promesas". Así, lamentou que aproveitase " o estado de alarma" para desenvolver esta normativa "sen diálogo co sector".

"REFORMA" DA NORMATIVA DE COSTAS

Nesta liña, reprobou que tratase de "coar pola porta de atrás" unha "reforma" da normativa de Costas mediante o proxecto de lei de cambio climático. Tamén criticou que o Executivo central buscase "enganar ao sector" e aos seus "compañeiros" do PSdeG, que "dicían que a reforma estaba parada".

O secretario xeral do PPdeG incidiu en que o Goberno recoñeceu que a modificación dos prazos das concesións poderían afectar a unhas 30 empresas que xeran 1.900 empregos. Por iso, acusouno de "atacar" á industria de transformación do mar do mesmo xeito no que actúa coas electrointensivas "negándose" a aprobar o Estatuto do Consumidor Electrointensivo.

Ante esta situación, Miguel Tellado concluíu que esta medida se debe a que os membros do Executivo central son conscientes de que "Galicia non é un caladoiro de votos" para o PSOE e a que buscan "reducir as súas oportunidades cando non lles apoian".

Así as cousas, pediu ao Goberno que preside Pedro Sánchez que "deixe de esforzarse en pechar" as empresas asentadas en Galicia. Tamén recalcou que, ademais da sustentabilidade ambiental, débese promover a mesma "no ámbito ecónomico e social" e protexer os postos de traballo ligados á pesca, da que Galicia é a décima exportadora a nivel mundial.