O mapa de incidencia da covid-19 nos concellos poderá consultarse desde este venres en Internet
Poderá accederse á información a través de dous mapas, un para os casos acumulados nos sete días e outro para os acumulados nos últimos 14.
Por Europa Press / Redacción | Santiago de Compostela | 08/10/2020 | Actualizada ás 19:13
O mapa de incidencia da covid-19 nos municipios galegos poderá consultarse desde este venres, día 9 de outubro, nunha nova sección da web de información sobre o coronavirus que ten habilitada a Xunta: coronavirus.sergas.gal.
Opresidente do Goberno galego, Alberto Núñez Feijóo, indicou que a páxina incluirá información "pormenorizada" por concellos de acordo cos parámetros consensuados entre a Xunta e a Federación Galega de Municipios e Provincias (Fegamp).
A Administración galega sinalou que se trata dunha mellora na presentación dos datos de evolución da infección por coronavirus, tanto en contido como na súa representación gráfica.
Deste xeito, poderá accederse á información a través de dous mapas, un para os casos acumulados nos sete días e outro para os acumulados nos últimos 14.
Ademais, estableceranse niveis de alerta --verde, amarelo, laranxa e vermello-- segundo os concellos de menos de 50.000 habitantes e os de máis de 50.000.
Esta sección web mostrará, ademais, o impacto actual da enfermidade en Galicia con indicadores que reflicten pacientes con infección activa; pacientes actualmente hospitalizados en coidados intensivos; pacientes contaxiados, curados e falecidos; casos confirmados por PCR nas últimas 24 horas e total de probas PCR e serolóxicas realizadas.
Ademais de mostrar a información de Galicia, poderanse obter os indicadores por área de saúde e a distribución de datos de hospitalizados e UCI por hospitais públicos e privados.
