A escavación arqueolóxica de Proendos, en Sober, saca á luz restos romanos dos séculoa I ao V

Os arqueólogos atoparon unha hipotética 'horrea' romana que, no caso de confirmarse, sería a máis grande de Galicia.

Por Europa Press / Redacción | Lemos | 09/10/2020 | Actualizada ás 19:25

Comparte esta noticia

O conselleiro de Cultura, Román Rodríguez, e o alcalde do municipio lucense de Sober, Luís Fernández Guitián, visitaron este venres o xacemento arqueolóxico de Proendos, onde nas últimas semanas está a completarse un traballo de campo no que saíron á luz numerosos materiais romanos de ampla cronoloxía, que van desde o século I ata o século V.

Escavación arqueolóxica en Proendos, Sober (Lugo)
Escavación arqueolóxica en Proendos, Sober (Lugo) | Fonte: Xunta.

Durante a visita, o titular de Cultura destacou a importancia dos restos atopados e a calidade do traballo levado a cabo e celebrou os achados, que profundan no "valor excepcional" da Ribeira Sacra, un territorio que se atopa na recta final para ser declarado Patrimonio da Humanidade pola Unesco. "Todos desexamos chegar a esta meta e descubrimentos como este fannos sentir máis preto de conseguilo", dixo.

Pola súa banda, o alcalde de Sober, Luís Fernández Guitián, mostrouse moi satisfeito e ilusionado cos resultados, xa que "se confirma que a lenda da mítica Proencia é unha realidade". O rexedor avanzou que para a primavera está previsto continuar con novas catas coa finalidade de delimitar a extensión do xacemento e sacar á luz as "construcións únicas" do alto imperio romano que os traballos previos do xeorradar prognostican.

DISTINTAS ESTRUTURAS

Estes traballos constataron, en só dez días de escavación, a existencia dun hipocausto, unha estancia oca que os romanos adoitaban construír debaixo do chan nas habitacións das vivendas e nos baños para que circulase o aire quente. Ademais, os arqueólogos tamén localizaron unha ábsida circular, un elemento arquitectónico de orixe romana presente tanto en edificios relixiosos como seculares, e unha hipotética 'horrea' romana que, no caso de confirmarse, sería a máis grande de Galicia e a primeira vinculada a unha vila romana.

A estas achegas súmanse os numerosos materiais ou os restos das estruturas das edificacións, que xa foron localizadas a un nivel moi superficial nas primeiras xornadas de traballo, ou a aparición dun mosaico romano que non se conserva íntegro, pero do que si apareceron varios fragmentos reducidos.

A prospección xeofísica levada a cabo polo Concello de Sober no ano 2019 xa permitiu constatar a existencia de, polo menos, un complexo de hipocaustos de extensión considerable, varios elementos de posible carácter público e de servizos, posibles estruturas de habitación, unha probable trama urbana ou estruturas funerarias, así como un hipotético sistema de condución de augas.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta