Atopan unha nova especie de libélula africana en Galicia que confirma a intensificación do cambio climático

O cambio climático semella imparable en Galicia. E diso parece dar conta a aparición de especies típicas de climas moito máis cálidos. De feito, así parece demostralo o achado dunha libélula. Pero non é unha libélula calquera, tratase dunha Diplacodes lefebvrii, coñecida comunmente como percher negro ou skimmer negro. É unha especie común nativa da maioría de África e o sur de Eurasia e nunca se atopara en Galicia... Ata agora.

Os naturalistas César Ayres e Miguel Domínguez-Costas, membros da AHE-Galicia (Asociacion Herpetologica Española) acaban de facer un gran descubrimento. O pasado 14 de xullo detectaron unha diplacodes  lefebvrii nun  humidal  preto  do  río  Miño, no concello  das  Neves. "Traballamos bastante nesa zona investigando poboacións de herpetos (anfibios e reptiles), e nunha das charcas que visitamos localizamos a esta especie. Despois buscamos a especie noutras zonas húmidas do tramo final do Miño, pero non localizamos máis exemplares", afirman en declaracións a Galicia Confidencial.

Esta especie semella estar expandíndose cara o Norte en varias  rexións  mediterráneas,  incluíndo  a  Península  Ibérica. "Pero ata agora só estaba citada a súa presenza no Centro e Sur da Península Ibérica, pero non en zonas tan o norte como Galicia", recoñecen os naturistas.

A NOVA ESPECIE, A 56, DE GALICIA

O novo achado  representa  o descubrimento dunha  nova  especie  para  odonatofauna  galega -- a especie 56-- e os investigadores destacan que "é preciso  máis  traballo  de  campo  para  determinar  a  súa  distribución en Galicia". "Polo momento é cedo para saber se esta especie conseguirá expandirse ou non, e as posibles interaccións con outras especies", comentan Cesar Ayres e Miguel Domínguez-Costa.

O seu descubrimento apunta tamén á posibilidade de que o cambio climático xa é unha realidade e poida estar estar detrás da migración de certas especies. "É o primeiro avistamento en Galicia, aínda que logo relocalizamos a especie máis veces na mesma zona. As citas mais cercanas semella que estaban na zona de Coimbra en Portugal e o centro de España", indican.

Estes naturalistas destacan que a zona do Miño ten moita influenza mediterranea, e a subida das temperaturas favorece a expansión das especies ligadas a este tipo de clima. De feito, lembran que nesta zona tamén foi detectada por primeira vez en Galicia a presenza doutra   libélula  de procedencia africana, aTrithemis annulata, que xa se expandiu de xeito natural
por Galicia.