CC.OO. ve necesaria a modernización do estaleiro de Navantia Ferrol para "non pór en perigo a súa viabilidade"

O secretario da sección sindical de CC.OO. en Navantia Ferrol, Miguel Pol, demandou a implicación da dirección da empresa naval pública e do ámbito político "para poder modernizar o estaleiro" e que sexa competitivo.

Sinala que así haberá "garantías de futuro" para reducir os custos e os prazos de execución dos traballos co fin de "non pór en perigo a viabilidade e o futuro dos postos de traballo" e dos "fillos" dos traballadores.

Así o expresou nunha comparecencia ante os medios este mércores na sede do seu sindicato en Ferrol, onde estivo acompañado do secretario xeral de CC.OO.-Industria en Galicia, Víctor Ledo, e da presidenta do comité de empresa de Nanvantia Fene, Adela López.

Entre as demandas trasladas por Pol atópanse a construción "inmediata do dique seco cuberto, como primeira medida". Segundo os estudos da propia empresa, a conversión das instalacións de Ferrol ao Estaleiro 4.0 levarían parellas "a redución dun 10% no prezo final dun barco", mentres "a construción dunha nova fragata pasaría dos 60 meses aos 45, é dicir, unha redución do 25% nos prazos".

O representante de CC.OO. tamén asegurou que este proxecto significaría contar con "unhas instalacións máis seguras, menos contaminantes" e que as obras para a súa materialización "son tamén sustentables desde o punto de vista social, coa xeración de emprego nunhas comarcas que sufriron dúas crise".

"En caso de non realizarse esta actuación o noso estaleiro tería data de caducidade, sen poder realizar varios proxectos á vez, en cadea", advirte.

Pol avanzou que "a moi curto prazo" vaise a reclamar á dirección e ao ámbito político que se ten que abordar a Declaración de Impacto Ambiental (DIA) do dique seco, "cos prazos de execución da obra e a necesidade de facer uso dos Fondos de recuperación da Unión Europea (UE)".

NOVA PRESIDENTA E TURBINAS

Así mesmo, Víctor Ledo dixo "non entender o cambio na dirección de Navantia", en alusión ao nomeamento dunha nova presidenta, Belén Gualda, en substitución de Susana de Sarriá.

"Unha cuestión anómala, sen dar ningunha información aos representantes dos traballadores e ás forzas sindicais, sen entender moito ao que obedece", critica.

Ledo avisa de que corren risco "moitos proxectos que estaban encima da mesa", pois se presentaba a posibilidade de utilizar fondos dispoñibles da Unión Europea, pero Navantia "non vai solicitar estas axudas".

Xunto a isto, recrimina a falta de aposta da dirección da empresa pública pola súa sección de turbinas no estaleiro de Ferrol.

SUBESTACIÓNS

Por último, a presidenta do comité de empresa de Navantia Fene, Adela López (CC.OO.), reclamou para o seu centro de traballo "un proxecto integro para o sector eólico mariño, non só como lugar de fabricación de 'jackets' ou estruturas flotantes, senón tamén subestacións eléctricas". Para estas últimas infraestruturas que a empresa pública sempre confiou aos estaleiros da baía de Cádiz.

Segundo López, "existe unha infrautilización das instalacións" da antiga Astano. "O sector da eólica mariña é bastante extenso e está en auxe para que nós podamos ter opción aos proxectos que se están barallando, dentro da propia Navantia, pero que non están a ser dirixidos facía o noso estaleiro", lamenta.

Representantes de CCOO na rolda de prensa sobre Navantia | Fonte: Europa Press