CSIF pide que Facenda atrase o arranque de calquera proceso selectivo sen iniciar ata despois do inverno
Para CSIF, "o que en ningún caso é admisible é o mantemento desta permanente situación de silencio" por parte da Consellería de Facenda, da que depende agora Función Pública, o que "está a provocar unha auténtica tortura emocional aos miles de opositores e as súas familias".
Por Europa Press / Redacción | SANTIAGO DE COMPOSTELA | 15/10/2020 | Actualizada ás 20:36
O sindicato CSIF insta á Dirección Xeral de Función Pública a que "sen máis dilación" dite a resolución oportuna para que se atrase o comezo de calquera proceso selectivo convocado e non iniciado ata despois do primeiro trimestre de 2021.
Nun comunicado, o sindicato apunta a necesidade de "dar certeza" e "seguridade" a todos os opositores e "permitirlles organizar a súa vida familiar e laboral", á vez que "sacalos do desgaste físico e angustia" debido á situación de pandemia.
Para CSIF, "o que en ningún caso é admisible é o mantemento desta permanente situación de silencio" por parte da Consellería de Facenda, da que depende agora Función Pública, o que "está a provocar unha auténtica tortura emocional aos miles de opositores e as súas familias".
Este sindicato lamenta que Facenda mantén en situación de "incerteza" a 46.000 opositores. Actualmente, ten convocados e pendentes de realización "multitude" de procesos selectivos de corpos xerais para os que xa están nomeados tribunais e aos que están convocadas 36.273 persoas. Outras 9.760 persoas están inscritas na chamada OPE social.
A eles hai que sumar os procesos convocados no ámbito dos servizos de prevención de incendios forestais, aos que están admitidos provisionalmente 8.475 persoas, así como habería que engadir os procesos de promoción interna dos funcionarios da administración xeral.
SITUACIÓN "GRAVE DE PANDEMIA"
Os procesos tiñan establecida a súa data de inicio a partir da segunda quincena do mes de outubro, segundo a información da Dirección Xeral de Función Pública, a condición de que a situación sanitaria así o permitise. Pero segundo os datos do Sergas, a evolución da pandemia en Galicia "continúa á alza" e, tendo en conta os criterios da OMS e a incidencia acumulada nos últimos 14 días, Galicia "esta en situación grave de pandemia".
Este escenario, sumado ás restricións de mobilidade e outras medidas que se van adoptando, levan á "inquietude" dos inscritos nos procesos selectivos, pese ao compromiso de avisar cun mes de antelación o inicio dos primeiros exercicios de cada oposición.
