O PSOE de Ourense non descarta unha moción de censura en solitario

O Partido Socialista de Ourense reiterou a súa proposta de que se permita o goberno da lista máis votada como "única solución posible" para "desenredar" a crise municipal na cidade e sinalou que "non se dubidará" en impulsar "unha moción censura en solitario chegado o caso".

Os socialistas ofreceron este venres unha rolda de prensa na que o portavoz local e secretario provincial, Rafael Rodríguez Villarino, estivo acompañado polos deputados autonómicos Marina Ortega, Carmen Rodríguez Dacosta e Juan Carlos Francisco Rivera.

Precisamente, o tamén responsable de Organización do PSOE provincial de Ourense, Juan Carlos Francisco Rivera sostivo que esta é a "única forma" de liquidar a situación "a menos que outra das forzas propoña un candidato á Alcaldía, opción que, aínda que non descarta, non ven viable. Por iso, considerou que "hai que deixar de darlle voltas e dar unha resposta clara".

Na mesma liña manifestouse Villarino, quen lembrou que el xa presentou esta proposta hai semanas "na primeira reunión de portavoces municipais" e subliñou que a súa postura é "clara" do mesmo xeito que a do BNG, que desde o principio mantivo que non quere cota de goberno senón formar parte dunha oposición construtiva.

Para Villarino, o PP fala dunha "xenerosidade" que desmenten desde o PSOE porque "non asinan a proposta, senón que pon condicións" como "formar parte do goberno". "Non apoiarán se é en minoría", indicou.

Precisamente, a xustificación do PP para impor a súa presenza no goberno é a necesidade de estabilidade para contar con 14 apoios dos 27 que integran a corporación municipal. Con todo, Villarino lembrou que xa houbo un goberno de 14 e que "non saíu adiante" polo que insistiu en que a estabilidade "non a dan os números".

Ademais, censurou que o PP comunicase que "sen eses 14 apoios os proxectos non sairán adiante", cuestión que, desde o punto de vista dos socialistas, dá a entender que "se están na oposición estarían dispostos a non apoiar as medidas que tome o goberno, sendo que se presentan como dialogantes".

Os socialistas defenderon que a moción de censura é unha ferramenta política que se pode empregar en casos como o que ocorre en Ourense. Por iso, no caso de "non chegar a acordos", indicou que non dubidarán en lanzar a súa moción de censura se "non prospera nos órganos de partido a proposta do Partido Popular para un goberno conxunto" e "comprobar quen a firma e quen non". "Aí si que se definirían as posturas", sinalou para asegurar que esperan "non ter que chegar a esa situación".

Ademais, sobre estas mesas de diálogo, os socialistas afirmaron que, aínda que son necesarias posto que a conversa é sempre o modo de chegar a acordos, non se están producindo demasiados avances, xa que "as outras forzas políticas están a usar palabras estratéxicas no canto dunhas palabras claras que demostren onde se sitúan". Con todo, recoñeceu que o BNG si deixou clara a súa posición.

Deste xeito, Villarino afirmou que estas mesas de diálogo veñen realizando por convocatoria de Ciudadanos, formación que considera tenta "buscar unha posición de mediador" entre PP e PSOE que, na súa opinión, "non lle corresponde", posto que o Partido Popular ten "a capacidade para tomar as súas propias decisións" e agora mesmo é unha decisión "clave" para solucionar "a crise do desgoberno".