Os positivos aumentan a 437 en 24 horas en Galicia, coa área de Vigo como novo foco ao sumar 101 casos
Ourense é a única área que descende en contaxios detectados en 24 horas que segundo os cálculos volven a valores de marzo. Ata o momento faleceron 818 persoas pola COVID.
Por Europa Press / Redacción | Santiago de Compostela | 18/10/2020 | Actualizada ás 11:49
Os contaxios de COVID-19 detectados en Galicia volveron a dispararse por encima dos 400 nas últimas 24 horas, concretamente ata os 437, o que supón o segundo pico máis alto da segunda onda da pandemia e colocarse en valores similares de finais de marzo.
Segundo a última actualización da web da Consellería de Sanidade na mañá deste domingo, con datos ata as 18,00 horas do sábado, as PCR positivas ascenderon en todas as áreas, excepto na de Ourense, e fixérono de forma destacada na de Vigo, que se coloca como novo foco ao sumar 101 infeccións nun día.
Tamén subiron os novos casos de coronavirus detectados na área sanitaria de Santiago e Barbanza, ata as 77 (+15); na Coruña, a 66 (+9); en Pontevedra e O Salnés, a 54 (+15); en Lugo, onde case se duplican, ata os 41 novos positivos (+19); e en Ferrol, con 20 (+1).
A única excepción é a área de Ourense, Verín e O Barco, que ata agora era principal foco da pandemia en Galicia con cinco municipios en illamento --ademais da capital provincial, Barbadás, Boborás, O Irixo e O Carballiño--. Nos datos deste domingo, a área ourensá figura cun total de 78 positivos en 24 horas, case unha vintena menos que un día atrás.
En canto ás altas, na última xornada curáronse 248 pacientes de COVID-19 en toda a Comunidade, o que sitúa o total desde o principio da pandemia en 23.326. Así mesmo, ata o momento faleceron 818 persoas diagnosticadas de coronavirus, tras o tres novas vítimas notificadas na tarde do sábado.
Así, os casos activos --persoas que aínda padecen a enfermidade-- repuntaron en 187, ata situarse nos 4.932 este domingo, por rexistrarse máis contagios que altas. De feito, subiron en todas as áreas salvo na de Ourense, que baixaron en 33, ata os 1.577 pacientes.
Pola súa banda, A Coruña e Cee sitúase como a segunda área con máis casos activos, con 839, tras unha subida de 32 nun día. Seguen a esta Santiago e Barbanza, con 719 pacientes (+33); Vigo, con 708 (+76); Pontevedra-O Salnés, con 457 (+41); Lugo, con 450 casos activos (+25); e Ferrol, 182 infectados de COVID (+13).
PCR E POSITIVIDADE
Así mesmo, a web de Sanidade reflicte que ata a data realizáronse 586.482 probas, o que significa que nas últimas 24 horas fixéronse 6.654 PCR, medio milleiro menos que un día antes. Así, a porcentaxe de positivos na Comunidade galega ascendeu este domingo ao 7,3%, por encima do 5,6% do sábado.
A área sanitaria coa positividad das PCR máis alta é Pontevedra-O Salnés, onde se disparou a case o dobre, a 12,7%. Tamén o resto, salvo a da Coruña e Cee (4,8%), superan o limiar do 5% que marca a Organización Mundial da Saúde: Lugo (8,5%), Santiago (7,9%), Ourense (7,7%), Ferrol (7,3%) e Vigo (6,5%).
