Santiago ve "preocupante" a evolución da pandemia que vincula coa mocidade e a mobilidade
A capital galega rexistra 23 festas en piso desde o xoves, das que tres son multadas con 750 euros, a contía máxima.
Por Europa Press / Redacción | Compostela | 19/10/2020 | Actualizada ás 13:51
O alcalde de Santiago, Xosé Sánchez Bugallo, tachou este luns de "profundamente preocupante" a evolución da pandemia do coronavirus na capital galega, que arrastra unha incidencia de 340 por 100.000 habitantes. Así, dixo que o Concello está "á espera" das medidas que adopte o comité clínico da Consellería de Sanidade na súa reunión do martes.
Na rolda de prensa posterior á xunta de goberno local deste luns, o rexedor advertiu que "sobre todo na última semana" os datos da COVID-19 "son negativos, con claridade", a pesar de que "aínda non tocaron teito". Precisamente, Santiago cumpre xa sete días consecutivos en alerta vermella no mapa por municipios que actualiza a Xunta de forma diaria.
Segundo concretou Bugallo, nas últimas dúas semanas a incidencia na capital "saltou de 200 a 300" contaxios por 100.000 habitantes, "un incremento lixeiramente superior ao 50 por cento". Este mesmo luns, os últimos datos do Concello recollen unha incidencia de 340 positivos por 100.000 habitantes.
Neste contexto, o alcalde dixo que o Consistorio está "á espera de coñecer cales serán" as medidas que adopte o comité clínico da Xunta este martes, pero non quixo avanzar nada porque é competencia das autoridades autonómicas. "O que temos que facer desde a Alcaldía é prestar todo o apoio e a colaboración posibles. Non me parece razoable que lle pretendamos marcarlle o guión", respondeu Bugallo, ao ser preguntado sobre se a Xunta debería prohibir as reunións convivientes ou illar a cidade, como xa ocorreu en Ourense.
O rexedor compostelán tan só desvelou que ten prevista unha conversación "antes de mediodía" co conselleiro de Sanidade, Julio García Comesaña, tras o cal convocará unha xunta de portavoces para abordar a situación co resto de grupos da corporación.
"MAL DE MOITOS" NON É "CONSOLO"
Bugallo insistiu na rolda de prensa deste luns en que a evolución da pandemia é "bastante coherente" coa do conxunto de España e Galicia, pero matizou que un "mal de moitos" non pode servir "de consolo para persoas sensatas e razoables".
"Temos que facer unha reflexión sobre que cousas non se están facendo ben en Santiago", engadiu, para seguidamente explicar que se trata dunha cidade "que ten moita máis mobilidade e máis poboación nova que a media", ambos os factores "de risco" no que respecta á pandemia, segundo as súas palabras.
Aínda que reiterou que "corresponde ás autoridades sanitarias" valorar máis ao detalle onde se producen os contagios, si asegurou que "hai varios focos" e que as festas en pisos son "os principais".
23 FESTAS DESDE O XOVES
Así, o alcalde de Santiago desvelou que ao longo da semana pasada, na que se endureceron as multas da ordenanza municipal de ruídos, foron denunciadas un total de 30 celebracións, "menos que as 58 da semana anterior".
