Por Europa Press / Redacción | Santiago de Compostela | 20/10/2020 | Actualizada ás 17:35
A Consellería de Sanidade comezou esta semana o primeiro cribado de covid-19 empregado mostras de saliva dos traballadores de centros sociosanitarios de Galicia. Esta técnica posibilita a autotoma por parte dos participantes e repetirase cada 14 días.
A súa principal vantaxe é a sinxeleza na toma de mostras. O profesional participante, na súa casa, recolle un mililitro de saliva ao levantarse, en xaxún sen tomar auga e sen lavarse os dentes, nun tubo. Esta mostra entrégase nas áreas sanitarias e remítese ao laboratorio de Microbioloxía da área sanitaria de Vigo. A análise das mostras leva a cabo mediante a técnica de pooling, que permite agrupar varias mostras nunha única análise.
En canto ás persoas residentes, dada a imposibilidade da recollida de mostra de saliva, realizarase unha mostraxe aleatoria cada 14 días. Esta mostraxe baséase nun modelo matemático que incorpora distintos parámetros que obxectivan a incidencia da infección ocasionada pola COVID-19 en cada área sanitaria, o que permite modificar o número de mostras recollidas en función da situación epidemiolóxica.
Con este cribado sistemático nas residencias galegas conseguirase a detección de persoas asintomáticas e, con iso, "a prevención e vixilancia" da infección ocasionada pola covid-19 e a toma de decisións "adaptadas á realidade de cada centro", explicou Sanidade.
MOSTRAXES
A Consellería de Sanidade realiza cribados xornais tanto no persoal, como nas persoas residentes. A primeira mostraxe nos centros residenciais de Galicia comezou o 2 de abril e terminou o 6 de maio. Realizáronse un total de 35.259 probas PCR, 23.238 a persoas residentes e 12.021 a profesionais en 375 recursos de maiores e 96 recursos de discapacidade e 17 pisos protexidos en comunidades terapéuticas de saúde mental e asistencia ás drogodependencias.
A segunda mostraxe comezou o 22 de xuño e concluíu o 22 de xullo. Realizáronse un total de 37.629 probas PCR, 22.285 a persoas residentes e 15.344 a profesionais en 375 recursos de maiores, 96 recursos de discapacidade e 13 pisos protexidos en comunidades terapéuticas de saúde mental e asistencia ás drogodependencias.
A terceira mostraxe, a última ata que comezou o actual cribado de saliva, dirixiuse ao persoal e realizouse mediante a proba PCR con mostra nasofarínxea. Cando se detectou un profesional positivo, levou a cabo o cribado completo da residencia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.