Traballadores de centros de Política Social suspenden as mobilizacións desta semana pola situación da pandemia
Por E.P. | SANTIAGO DE COMPOSTELA | 21/10/2020 | Actualizada ás 20:15
Os traballadores dos centros residenciais de Política Social non realizarán este xoves as mobilizacións que habitualmente fan fronte aos centros para reclamar melloras nas súas condicións laborais e a recuperación de dereitos.
A decisión de suspender esta actividade, explicaron os representantes sindicais a través dun comunicado, débese á evolución da pandemia de coronavirus en Galicia, que obrigou a impor novas restricións desde esta medianoite.
Aínda así, afirman que "non decaerán" á hora de seguir reclamando a recuperación dos dereitos suspendidos no ano 2012 e o reforzo de medios materiais e humanos. De feito, o próximo 29 de outubro teñen previsto reunións cos distintos grupos parlamentarios para trasladarlles as súas reclamacións.
