O BNG da Coruña esixe ao PSOE que reconsidere a súa decisión de prorrogar os orzamentos e "cumpra o pactado"

O portavoz do BNG no Concello da Coruña, Francisco Jorquera, esixiu a PSOE "cumprir o pactado" en referencia ao acordo de investidura e a reconsiderar a súa decisión de prorrogar os orzamentos en lugar de elaborar uns novos.

Fíxoo nunha comparecencia informativa acompañado pola concelleira Avia Veira, na que reivindicou ao BNG como unha "alternativa fiable" nun concello, ao seu xuízo, marcado pola "inestabilidade". "Mesmo en certos aspectos de interinidade", apuntou sobre a remodelación do goberno e os cambios na oposición.

Por outra banda, dixo que a decisión de prorrogar os orzamentos é "outro síntoma de debilidade" e, por iso, instou ao goberno local a reconsiderar a súa decisión ao rexeitar negociacións parciais do mesmo a través das ordenanzas fiscais ou o plan de reactivación económica e defender unha negociación en conxunto.

"O goberno --local-- está nunha situación de minoría, ten que ter certa humildade", afirmou ao apelar á vontade de diálogo da súa formación. No entanto, sinalou que se o PSOE "aposta por un xiro á dereita, vai ter un claro opositor".

Por outra banda, rexeitou que o PP poida ser unha "alternativa". "É parte do problema", aludindo, entre outras cuestións, ao tres cambios na portavocía deste gurpo municipal. "Ao ritmo que van, van acabar rotando todos os concelleiros". "É unha delegación local da Xunta", dixo tamén.

A ALCALDESA REXEITA UN CAMBIO

Pola súa banda, a alcaldesa, Inés Rey, na súa visita á biblioteca do Fórum Metropolitano e a preguntas dos xornalistas, rexeitou un "cambio de opinión" sobre a prórroga dos orzamentos.

Entre outros argumentos, expuxo que o consistorio non sabe "que ingresos" vai recibir. "E porque facer uns orzamentos novos suporía unha diminución de ingresos e implicaría facer recortes, é a maneira que temos de saír desta crise podendo investir en gasto social".

Con todo, trasladou o seu agradecemento á "vontade de diálogo de todos os grupos municipais". "Recollo a luva desa vontade negociadora", recalcou.