Carmela Silva desafía a "testosterona" de Alfonso Rueda polas discrepancias sobre a Mesa do Camiño

A presidenta da Deputación de Pontevedra, Carmela Silva, cargou contra a "testosterona" do vicepresidente da Xunta, Alfonso Rueda, despois de que o dirixente do Goberno galego pedise por carta un cambio na celebración da Mesa do Camiño ao coincidir co Consello do próximo xoves.

Así, Silva tachou de "ridícula" a carta que lle remitiu o vicepresidente da Xunta. "Se realmente o vicepresidente da Xunta fose unha persoa seria, con menos testosterona da que ten, pois con chamar estaba todo arranxado", sostén Silva, xa que nese caso "non habería ningún problema de cambiar a convocatoria".

Carmela Silva explicou en rolda de prensa que a Deputación de Pontevedra convocou o pasado 14 de outubro a reunión da Mesa do Camiño para o vindeiro xoves, 29 de outubro, "tendo en conta a axenda da presidenta da Deputación, porque é unha mesa provincial, non é autonómica".

Deste xeito, mantense a convocatoria da Mesa do Camiño para o vindeiro xoves, aínda que nas seguintes reunións non volverá coincidir coa celebración o Consello da Xunta.

Ademais, Carmela Silva compartiu a súa "preocupación" por que Alfonso Rueda asumise as competencias de Turismo. "Eu prefería a Román (Rodríguez) que ten outra forma de facer as cousas, de relacionarse, é máis respectuoso, ten menos testosterona, crese menos importante", apostila.

"TEORÍA DA CONSPIRACIÓN"

O pasado xoves, a Deputación recibiu a carta de Alfonso Rueda na que trasladaba á presidenta provincial o seu interese en participar na Mesa dada a importancia do turismo e do Camiño ás portas do Xacobeo 2021.

Na misiva tamén lle lembraba que a convocatoria volve realizarse coincidindo cun Consello da Xunta, a pesar de que xa se advertiu desta situación anteriormente, o que impediría a asistencia do propio Rueda, polo que pide o seu cambio e propuña outras datas alternativas.

A presidenta criticou esta "teoría da conspiración", que tacha de "infantil". "Vostede fai o ridículo con esta carta", espetoulle Silva a Rueda. "Tanto no contido como nas formas é realmente triste", lamentou. Tamén se queixou de que en 10 días non chamase á Deputación par cambiar a data desta convocatoria.

Xunto a isto, Silva asegura que "na carta mente" cando di que na anterior reunión xa se fixo coincidir coa celebración do Consello da Xunta xa que, como lembrou, tivo lugar un mércores e asistiu o anterior conselleiro de Turismo, Román Rodríguez, e quen se ausentou foi a propia Carmela Silva polo falecemento da súa nai. Para Carmela Silva, "o señor Roda só se sente cómodo na confrontación, particularmente, coa presidenta da Deputación, encántalle".

E engadiu a mandataria provincial que "hai señores que teñen tan integrados os postulados patriarcales de testosterona e androcéntricos que cren que o mundo vira ao redor deles e que cando a xente toma decisións a toma pensando neles". "Non pensei en nada en vostede", dixo sobre a convocatoria da Mesa do Camiño, "porque vostede non é tan importante".

Outra explicación que atopa Carmela Silva é que o número dous do Goberno galego "é tan soberbio que cre que nada pode saír ben se non está el presente". Subliña que a Mesa do Camiño leva moito tempo traballando coa Xunta con Nava Castro "e sempre foi todo moi ben", pois a directora xeral de Turismo é "unha dignísima representante da Xunta".

A presidenta da Deputación de Pontevedra, Carmela Silva.. DEPUTACIÓN DE PONTEVEDRA