Decretado toque de queda desde as 23.00 ata ás 06.00 horas que poderá ser xestionado polas autonomías
Os gobernos poden aumentar ou diminiuir ese toque de queda. Galicia insiste en que "unha lexislación nacional" evitaría "determinacións tan drásticas" como o estado de alarma
Por Europa Press / Redacción | SANTIAGO DE COMPOSTELA | 25/10/2020 | Actualizada ás 14:13
Pedro Sánchez anunciou este domingo, despois dun Consello de Ministros extraordinario, o decreto dun estado de alarma que entrará en vigor esta tarde e que, sen chegar ao confinamento total, permita un paraugas legal para os toques de queda e as restricións á mobilidade que están a aprobar as comunidades autónomas ante a segunda onda do coronavirus.
O novo decreto do estado de alarma, de feito, non se parece en case nada ao primeiro. A idea é que se poida prolongar até o 9 de maio co obxectivo de restrinxir a mobilidade, pero esta vez a xestión recaerá nas comunidades autónomas (non como en marzo, cando o Goberno exercía como mando único). O estado de alarma, previsto no artigo 116 da Constitución, non implica, por tanto, un confinamento total. Ademais, a diferenza de en marzo, agora si que parece clara cal será a súa duración.
Así mesmo, establece un toque de queda desde as 23.00 horas ata o seis da madrugada, aínda que pode ser modulado polas autonomías, adiantando ás 22.00 horas e retrasandalo ata as doce da noite. Tamén o poden modificar para que finalice ás cinco ou ás sete da madrugada.
O estado de alarma fora pedido nas últimas horas polas comunidades autónomas do País Vasco, Cataluña, Cantabria, así como a maioría de gobernos rexionais do PSOE. Pola contra, ningunha das autonomías gobernadas polo PP solicitaron esa medida.
A XUNTA, EN CONTRA
A Xunta, a través do seu vicepresidente primeiro, Alfonso Rueda, remarcou a súa oposición á declaración do estado de alarma pois consideran que "unha lexislación nacional" evitaría ter que tomar unha "determinación tan drástica" como a adopción deste mecanismo constitucional que permite a restrición de dereitos fundamentais.
Nunha entrevista na Radio Galega, lembrou que Galicia enviou a súa proposta normativa que, segundo Rueda, o Goberno central presidido por Pedro Sánchez non ofreceu resposta. "Parece que non lle fixo moito caso", dixo antes de subliñar que esta norma xeral evitaría "incertezas" e a disparidade de criterios a nivel xurídico que se produciron nas últimas semanas coas medidas adoptadas en distintos gobernos rexionais.
Con todo, a Xunta podería enviar esta lei ao PP para que sexa este partido quen presente esta norma no Congreso, pero, polo momento, négase a facelo. Tamén Feijóo se opón ao estado de alarma polo "custe reputacional" que terá para España.
RESERVAS
O presidente do Goberno, Pedro Sánchez, asegurou que España conta cunha reserva estratéxica sanitaria con preto de 600 millóns de máscaras e uns dous millóns de test antíxenos, e pediu aos cidadáns que se descarguen no seu móbil a aplicación Radar Covid.
"O noso país conta coas capacidades necesarias para facer fronte a esta segunda onda. Temos provisións, recursos materiais e acumulamos unha experiencia colectiva de gran valor", manifestou este domingo Sánchez durante a súa intervención en rolda de prensa, na que decretou por segunda vez o estado de alarma en España.
En concreto, o presidente do Executivo precisou que esa reserva estratéxica conta con máis de 512 millóns de máscaras cirúrxicas e de 57,6 millóns de máscaras FFP2. Así mesmo, lembrou que o Ministerio de Sanidade mantivo un total de 182 reunións coas comunidades autónomas, coas que fixou os indicadores e criterios de respostas comúns fronte á pandemia.
