Por E.P. | SANTIAGO DE COMPOSTELA | 27/10/2020 | Actualizada ás 19:50
Os servizos xurídicos do Concello de Santiago estudan a sentenza que anula o veto a destinar vivendas a aloxamentos turísticos temporais na zona antiga da capital galega, e o rexedor, Xosé Sánchez Bugallo, anticipou que o fallo "se recorrerá se é recorrible".
Así o confirmou nunha entrevista na Cadea SER, un día despois de que a sección segunda da Sala do Contencioso-administrativo do Tribunal Superior de Xustiza de Galicia (TSXG) anulou a prohibición de destinar vivendas a aloxamentos turísticos temporais na zona antiga de Santiago de Compostela.
O alto tribunal estimou de forma parcial un recurso presentado por un particular contra a modificación do Plan Especial-1 de Protección e Rehabilitación da Cidade Histórica, impulsada polo anterior goberno local de Compostela Aberta e aprobada polo pleno do Concello de Santiago o 15 de novembro de 2018
O TSXG indica na resolución que "existe xustificación" para levar a cabo esa modificación do plan, pois considera que está "motivada" e baseada "en razóns de interese público".
Con todo, queda anulada por infrinxir o procedemento legalmente establecido, que obrigaba á súa exposición pública antes da aprobación porque se introduciron "modificacións substanciais".
COMPOSTELA ABERTA: "UNHA CUESTIÓN DE FORMA"
Precisamente desde Compostela Aberta a concelleira Marta Lois incidiu en que o propio tribunal ratifica que "é máis unha cuestión de forma que de fondo" e "dá a razón" á ordenanza.
Por iso, advertiu que o goberno local debe "facer todo o posible" para recorrela e que unha cuestión "de forma" non afecte a unha decisión que favorece "o interese xeral" dos composteláns e non impacte nas arcas municipais.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.