O salario medio por hora estancouse nos 8,4 euros nos últimos anos
As mulleres cobran 1,5 euros menos á hora que os homes.
Por Europa Press / Redacción | SANTIAGO DE COMPOSTELA | 30/10/2020 | Actualizada ás 13:05
O salario medio por hora que recibiron os galegos en 2018 foi de 8,4 euros, unha cifra que permanece sen cambios respecto ao ano 2017, segundo os datos que publica este venres o Instituto Galego de Estatística (IGE).
Se se toma como referencia a mediana, o salario por hora foi de 6,7 euros, o que quere dicir que o 50% das persoas asalariadas teñen un salario de inferior a esa cifra.
No tocante ás sete cidades, todas teñen un salario medio igual ou superior á media galega, excepto Lugo (8,1 euros) e Ourense (8,1 euros). Á cabeza está A Coruña (9,7 euros), seguida de Santiago (9,4 euros), Vigo (9,4 euros), Ferrol (8,7 euros) e Pontevedra (8,6 euros).
Así mesmo, apréciase diferenza por sexos nestes salarios, xa que os homes galegos reciben 9,1 euros por horas, fronte ás mulleres que tan só obteñen 7,7 euros. Tamén se observa que a medida que sobe a idade aumentan os salarios. Os maiores de 55 anos son os que máis cobran (9,5 euros por hora), mentres que a franxa de 16 a 35 anos queda en 6,7 euros.
Pola súa banda, hai unha diferenza de máis dun euro entre os contratos indefinidos (8,4 euros) e os temporais (7,2 euros), así como en xornada completa (8,8 euros) ou parcial (7,2 euros).
