A Xunta e a Armada colaboran na extracción dun canón de bronce do século XVI da enseada de Mugardos

A directora xeral de Patrimonio Cultural, María del Carmen Martínez Insua, supervisou este martes a actuación realizada na enseada de Mugardos para recuperar un canón de bronce do século XVI. Trátase dunha intervención na que o Goberno galego colabora coa Armada Española e que permite rescatar e documentar unha importante peza do patrimonio arqueolóxico subacuático que podía correr risco de espolio.

Así, nesta xornada, membros da Unidade de Mergullo de Ferrol, nun equipo liderado polo arqueólogo Miguel San Claudio, desprazáronse ata o punto no que se atopaba o canón, unha peza afundida desde antes de 1579 cuxo orixe máis probable apunta a un naufraxio dunha embarcación ou que se arroxasen pola borda pezas de gran peso para evitar un afundimento.

O canón de bronce, así como o total dos elementos extraídos nesta xornada, serán trasladados ao Museo Naval de Ferrol, onde serán restaurados para, posteriormente, ser expostos dado o seu importante interese.

Na visita á unidade militar de Ferrol, a representante da Consellería de Cultura destacou a importancia destes traballos que permiten "salvagardar a integridade dun ben do Catálogo do patrimonio cultural de Galicia", así como "contribuír á protección, conservación, acrecentamento e difusión do patrimonio subacuático".

Nesta mesma liña, lembrou que esta actuación se integra dentro dun proxecto desenvolvido en colaboración coa Armada Española e no que tamén se enmarca a intervención levada a cabo durante tres semanas no pecio San Giacomo de Ribadeo, finalizada o pasado venres despois de localizar elementos de especial relevancia como unha cureña naval, unha gran cantidade de munición de pedra e ferro e varias pezas de cerámica.