Por Europa Press / Redacción | SANTIAGO DE COMPOSTELA | 04/11/2020 | Actualizada ás 17:45
O comité de empresa do persoal laboral da Administración Xeral do Estado da Coruña denunciou a "persecución" do Ministerio de Defensa cara aos integrantes do corpo de bombeiros do Arsenal Militar de Ferrol.
En concreto, asegurou que se impuxo "unha sanción disciplinaria, de suspensión de emprego e soldo durante un mes" contra dous dos bombeiros por "unhas manifestacións" realizadas por ambos nun xornal rexional o 15 de agosto de 2019.
Nelas, os traballadores advertían da falta de persoal e de medios materiais neste servizo, mostrando a parte sindical a súa oposición a estas sancións "por unhas manifestacións totalmente veraces e que non divulgan ningún dato protexido, xa que toda esta información é pública e accesible para calquera cidadán".
A través dun comunicado, desde este comité aseguran que estas denuncias son a que se adoitan trasladar á opinión pública e ao propio Ministerio de Defensa "sen éxito", e que ademais "a situación do servizo resulta insustentable, tal e como nos recoñeceron desde o Arsenal nunha reunión con este comité de empresa".
PRAZAS AMORTIZADAS
Neste sentido, denuncian que ao longo dos últimos "foron moitos os efectivos que se perderon, situación que se pode comprobar nas Relacións de Postos de Traballo (RPT) que Defensa publica no Portal de Transparencia". "Son notorias as carencias no que a medios se refire, avaladas estas por as sentenzas públicas a favor dos traballadores nas súas reclamacións de algo tan básico como os seus traxes ou equipos de protección individual (EPI)".
Así mesmo, inciden no temor a que a intención sexa "o desmantelamento" do servizo de extinción de incendios, un equipo que resulta "imprescindible".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.