Compromiso do BNG ante os transportistas para pedir "axilidade" na tramitación de bonificacións da AP-9
Ao tempo, recolleron as reclamacións do sector para que as bonificacións inclúan tamén o transporte público e o de mercadorías e aos vehículos de menos de 7.500 quilos.
Por Europa Press / Redacción | SANTIAGO DE COMPOSTELA | 06/11/2020 | Actualizada ás 19:58
O BNG comprométese ante distintos representantes de asociacións de transportistas a pedir "axilidade" na tramitación das bonificacións das peaxes da AP-9.
A portavoz nacional do BNG, Ana Pontón, e o deputado no Congreso, Néstor Rego, mantiveron unha reunión con representantes de asociacións de transportes de viaxeiros e mercadorías por estrada, para explicar "as vantaxes da rebaixa das peaxes" nesta autoestrada, que o BNG negociou como parte do acordo de investidura de Pedro Sánchez e que agora se inclúen no proxecto de orzamentos.
Trátase de 50 millóns para bonificacións de viaxes para usuarios recorrentes e dúas partidas adicionais para absorber o incremento anual do 1 por cento que corresponde aos convenios de 2011 e 2013, de forma que non se repercutirán nas tarifas. Tamén esta partida vai encamiñada á supresión da peaxe do tramo Vigo-Redodela.
Neste sentido, tanto a portavoz nacional como o deputado no Congreso "comprometeron o esforzo do BNG para axilizar a tramitación das medidas e que se fagan efectivas xa desde primeiros de ano".
Ao tempo, recolleron as reclamacións do sector para que as bonificacións inclúan tamén o transporte público e o de mercadorías e aos vehículos de menos de 7.500 quilos, así como a conveniencia de dar un tratamento especial a tramos de especial densidade como o de Puxeiros-Porriño-Tui.
Na reunión, á que tamén asistiron os deputados Luís Bará e Alexandra Fernández, participaron representantes de Anetra, Transgacar, Fegatravi, Fegabus, Fegatramer, Fegatrans e Fegram.
