Por E.P. | Santiago de Compostela | 10/11/2020 | Actualizada ás 19:26
As cidades galegas acolleron este martes concentracións de apoio para impulsar unha iniciativa popular na que se pide un sistema público galego de atención ás persoas e que a CIG promoverá nas próximas semanas na Cámara galega.
Na concentración celebrada na capital galega, o secretario xeral da CIG, Paulo Carril, anunciou esta iniciativa de impulso sobre a base de que a crise sanitaria derivada da covid-19 "puxo máis de manifesto que nunca a necesidade de pór os coidados nas prioridades das políticas públicas". E, por tanto, "a urxencia de investimento público en servizos de atención ás persoas", engadiu Carril, quen indicou que a proposta será levada á Cámara galega a través dunha proposición non de lei de iniciativa popular, para o que se necesitan 2.500 firmas e que logo pode ser asumida por calquera grupo para levala a pleno ou comisión.
O secretario xeral de CIG lembrou que a central sindical leva anos denunciando a situación, tanto laboral como asistencial, das residencias da terceira idade, dos centros de día, centros de atención á diversidade e dos servizos de axuda no fogar. "O Goberno do PP na Xunta vén desmantelando e privatizando para facer deles un novo negocio á conta das persoas máis vulnerables", sinalou Carril, quen dixo que a "explotación e a precariedade teñen un compoñente de xénero".
A futura iniciativa define os servizos que deberán incluír este servizo público de atención ás persoas, que terán que estar dotados de persoal e recursos materiais, así como infraestruturas adecuadas. Tamén aspira a que se "eliminen repagos" nestes servizos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.