Por E.P. | CORUÑA, A | 11/11/2020 | Actualizada ás 16:38
O avogado do Estado xefe en Galicia, Javier Suárez, estimou que inventariar os bens do Pazo de Meirás "levará un tempo". "Hai que ver o que hai", expuxo á saída do inmoble tras unhas catro horas no interior.
A preguntas dos medios, explicou que no pazo seguen os técnicos e insistiu en que o labor que se levará a cabo é unha "actuación técnica", en relación ás fotos e vídeos sobre os bens existentes, tanto no interior como no exterior, co fin de que os técnicos de Patrimonio que emitirán un informe teñan a documentación necesaria.
Preguntado se este mércores podería estar finalizado esta actuación, mostrouse convencido de que "tardará". "É un proceso que levará un tempo, hai que ver o que hai", sentenciou en relación aos bens existentes.
Sobre a data fixada polo Xulgado de Primeira Instancia número 1 da Coruña para a execución provisional da sentenza --sobre a que os Franco avanzaron que non se oporán, á espera de que se resolva o seu recurso de apelación ante a Audiencia Provincial da Coruña--, admitiu que non saben se o día fixado, o 10 de decembro, se poderá manter.
E é que, entre os numerosos bens que hai no pazo, están as estatuas de Isaac e Abraham, do Mestre Mateo, pero tamén fondos da biblioteca de Emilia Pardo Bazán, polo menos 3.200 volumes, segundo estimacións da Real Academia Galega (RAG), obras de arte e pezas históricas.
Mentres, a preguntas dos xornalistas, explicou que o labor no pazo transcorre "con normalidade" e coa "colaboración" pola parte demandada no proceso xudicial que iniciou o Estado e polo que o Xulgado de Primeira Instancia número 1 da Coruña ordenou a devolución do mesmo ao patrimonio público.
SADA PIDE DECLARAR BIC MÁIS BENS
Tanto no exterior do pazo, unha vez que entrou a comitiva xudicial e os letrados, así como os técnicos, como con posterioridade, o alcalde de Sada, Benito Portela agradeceu a "prema xudicial" no proceso. "Axuda a que esteamos máis preto de que sexa incorporado ao patrimonio público", dixo sobre o pazo. Sobre o seu contido, lembrou que o concello solicitou a incoación dun expediente para incorporar o resultado deste inventario á declaración de BIC do pazo.
"Independentemente da titularidade de calquera cousa, que permanezan dentro porque entendemos que teñen un interese conxunto", dixo excluíndo diso pezas que se consideren exclusivamente de ámbito persoal.
Respecto da viabilidade de conservar bens que están dentro do pazo, pero que non foron incluídos na demanda do Estado contra os Franco, reiterou que se se incorporan ao decreto BIC "terán que ser conservados dentro do sitio histórico Pazo de Meirás". Así, considerou que "moitos deles" deberían permanecer nel, entre os que citou a biblioteca de Pardo Bazán.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.