Por E.P. | SANTIAGO DE COMPOSTELA | 11/11/2020 | Actualizada ás 17:53
O Parlamento de Galicia, con só os votos a favor do Partido Popular, situouse en contra do decreto impulsado polo Ministerio de Educación e que, segundo denuncian os populares, permite un "aprobado xeral" que "prexudica directamente o alumnado".
A iniciativa, presentada en forma de proposición non de lei, foi defendida polo deputado popular Ovidio Rodeiro, quen censurou que esta medida rebaixa o nivel e os requisitos para que un alumnado aprobe, promocione ou titule no curso 2020-21. "A calidade da educación non se consegue igualando o nivel cara abaixo, senón fomentando a mellora e a modernización do sistema educativo do conxunto de España e propiciando que cada comunidade autónoma mellore o seu sistema para sumar e non para restar", sinalou.
Na súa intervención, o portavoz de Educación do Grupo Popular sinalou que esta decisión do Ministerio de Educación "debe verse como unha deslealdade institucional e unha imposición, xa que non foi tratada previamente coas comunidades autónomas, nin cos sindicatos, nin coas organizacións profesionais ou educativas".
Tamén cualificou o "aprobado xeral" como unha "aberración pedagóxica" que "legaliza a ignorancia", "prexudicando directamente o alumnado porque xerará desigualdade". "O que cremos que busca esta normativa é maquillar as estatísticas educativas, por exemplo o número de repetidores ou o número de titulados en ESO ou en Bacharelato", apuntou.
Precisamente, para "atallar as debilidades" deste texto e "preservar a calidade do sistema educativo" galego "fomentando a cultura do esforzo", Ovidio Rodeiro sinalou que a Consellería de Educación creou un grupo de traballo formado por docentes e inspectores que velará por estas cuestións.
A OPOSICIÓN OPONSE Á INICIATIVA DO PP
En fronte, tanto nacionalistas como socialistas mostraron o seu rexeitamento á iniciativa presentada polos populares galegos ao considerar que só busca profundar na estratexia de "enfrontamento" co Goberno central. Neste sentido, o portavoz de Educación do BNG, Manuel Lorenzo, censurou que o "único obxectivo" da proposta do PPdeG sexa incidir no "pimpampum sistemático" contra o Executivo estatal.
"É unha iniciativa que nada ten que ver coa educación, nada ten que ver coa evolución, nada ten que ver coa xestión da realidade dos centros", manifestou o nacionalista, que sostivo que do que se trata é de "non penalizar dobremente" a aqueles alumnos que se visen afectados pola situación de pandemia con tamén perder un ano.
Nesta liña, o socialista Luís Álvarez tamén enmarcou a proposición non de lei do PPdeG na "cruzada" dos populares galegos contra "toda canta normativa" emane do actual goberno do Estado. "O que nos quedará por ver durante a tramitación da nova lei orgánica de educación", exclamou o deputado do PSdeG, que sostido que, durante os meses de suspensión da educación pola covid, a Xunta "ditou normativa de idéntico contendido" ao que agora os populares galegos cuestionan do Estado.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.