Nova protesta en defensa dos hostaleiros
Medio milleiro de persoas participan nunha concentración ante a delegación territorial da Xunta en Pontevedra.
Por E.P. | Pontevedra | 16/11/2020 | Actualizada ás 16:52
Sobre medio milleiro de persoas participaron este luns nunha concentración de protesta ante a delegación territorial da Xunta en Pontevedra en apoio ao sector hostaleiro. "Non somos o problema, somos a solución", reivindicaron para esixir axudas públicas e exencións de impostos.
A concentración foi convocada pola Asociación Hostaleiros Empresarios de Pontevedra (Hoempo), a Asociación de Hostaleiros de Marín e a Plataforma Afectados Covid Pontevedra. Os asistentes acudiron vestidos de loito, con pancartas e fixeron soar bucinas e cacerolas.
No manifesto lido durante a concentración os afectados advertiron que as restricións postas en marcha polas administracións condenan á morte a un colectivo que se sente "inxustamente maltratado" e que "sustenta unha enorme cadea de sectores, desde o primario, produtores, elaboradores e distribuidores". "Que veñen ao abismo connosco", abundaron.
Cunha soga ao pescozo "para representar a situación" que viven, compareceu o presidente de Hoempo, Víctor Pampín, quen explicou que o sector hostaleiro se sente sinalado como responsable da segunda onda da Covid-19. "Non somos un foco de infección, senón un sector que está criminalizado", declarou.
Víctor Pampín insistiu en que os informes do Ministerio de Sanidade sinalan que na segunda onda da pandemia os contaxios vinculados a bares e restaurantes supoñen o 3,2% do total desde maio.
O presidente de Hoempo tamén alertou que máis do 15% dos establecementos de hostalaría pechará por mor da pandemia, polo que reclaman "axudas" para poder manter os seus "negocios á boia" e non verse "obrigados a pechalos".
Este portavoz considera "insuficientes" as axudas anunciadas ata a data polos gobernos das distintas administracións. Entre as esixencias dos hostaleiros para poder superar esta crise inclúese a exención e devolución das taxas municipais do 2020, que se cubran os gastos fixos mensuais de autónomos e empresarios e un ERTE único e facilidade de fraccionamento de todos os impostos e cargas sociais.
"A saúde é o primeiro, pero queremos desenvolver o noso traballo baixo as normas que nos marque Sanidade", conclúe o sector coa petición a toda a cidadanía de que se una á súa causa porque "como serías sen a hostalaría?", sentencia o manifesto.
