Máis de 600 persoas identificadas e 28 denunciadas por incumprir as restricións no fin de semana
Os axentes controlaron que se cumprían as medidas nos establecementos abertos ao público, terrazas e espectáculos públicos.
Por E.P. | SANTIAGO DE COMPOSTELA | 17/11/2020 | Actualizada ás 11:38
Máis de 600 persoas foron identificadas e 28 denuncias foron tramitadas en sete operativos con 121 inspeccións realizadas por axentes da Policía Autonómica en 23 concellos galegos para velar polo control das restricións para facer fronte á Covid-19 durante o fin de semana.
Diso informou a Vicepresidencia da Xunta nun comunicado, no que detalla que, do conxunto de accións, os axentes realizaron 35 inspeccións en catro municipios da provincia da Coruña, nos que foron identificadas 25 persoas e tramitadas 12 actas de infracción.
A Policía Autonómica destinou efectivos entre o 13 e o 15 de novembro a controlar o cumprimento das medidas vixentes para frear a expansión do virus en diversos municipios da provincia coruñesa como Ames, A Coruña, Noia e Santiago de Compostela.
Durante os operativos, os axentes controlaron que nos establecementos abertos ao público, terrazas e espectáculos públicos se cumprían as medidas aprobadas polas autoridades sanitarias, como o uso da máscara, o cumprimento da distancia de seguridade, así como o aforamento e o horario de peche dos locais e a prevención do botellón.
