Montero nega que os PGE "discriminen" a Galicia e acusa ao BNG de "preferir" as contas do PP
Néstor Rego acusa á ministra de Facenda de "demagoxia".
Por Europa Press / Redacción | SANTIAGO DE COMPOSTELA | 18/11/2020 | Actualizada ás 12:37
A ministra de Facenda, María Jesús Montero, reivindicou o trato a Galicia nos Orzamentos Xerais do Estado (PGE) de 2021 ao negar que exista unha "discriminación" neste territorio e acusou ao deputado do BNG, Néstor Rego, de preferir as contas públicas do antigo titular de Facenda Cristóbal Montoro.
Así llo dixo Montero ao parlamentario do BNG durante a sesión de control ao Goberno no Congreso dos Deputados, onde a ministra de Facenda defendeu o investimento en Galicia e no resto de territorios. Neste sentido, a titular de Facenda arremeteu contra o Bloque Nacionalista Galego emprazándoos a explicar no seu territorio "por que se opón a unhas contas públicas que incrementan o investimento en Galicia".
Segundo Montero, Rego e o seu partido "prefiren" os antigos Orzamentos de Montoro porque, "dicir que non se tramiten estas contas, significa que queden vixentes o PGE da dereita, do señor Rajoy". "Por tanto, se o que pretende a súa formación política ou o que quere facer crer é que temos un trato discriminatorio con Galicia, está a enganar aos galegos e aos españois", aseverou Montero.
"É PURA DEMAGOXIA"
Con todo, o deputado galego considera que é "pura demagoxia" dicir que o seu partido apoia as contas públicas de Montoro e lembrou que o BNG coincidía co PSdeG cando cualificaba o PGE do PP como "unha labazada" para Galicia. "Pero o actual PGE non só mantén a labazada, senón que engade outra na outra fazula", censurou o deputado do BNG, que pediu a Montero que non compare o investimento recollido neste proxecto co PGE de 2019 que foron tombados no Congreso.
Iso si, Rego mostrou a súa disposición a seguir traballando para conseguir que o PGE "sexan xustos" con Galicia, pero cre que o Goberno "ten que moverse" porque, pola contra, "terá que explicarllo a todos os galegos".
