O 80% das mulleres pensa que hai "un machismo xeralizado no rural"

A Federación de Asociacións de Mulleres Rurais (Fademur) apostou por potenciar o acceso a recursos de axuda ou apoio a vítimas de violencia de xénero para residentes no rural, onde un 72,9% das mulleres non interpuxo unha denuncia tras sufrir malos tratos, segundo un informe da entidade que recolle que o 80% das mulleres pensa que hai "machuismo xeralizado" no rural.

Nunha rolda de prensa telemática celebrada este mércores, a presidenta de Fademur Galicia, Rosa Arcos, presentou os resultados dun estudo elaborado por esta organización e encargado baixo o Pacto de Estado en materia de violencia de xénero. 

En concreto, Rosa Arcos explicou que o informe se levou a cabo entre 2018 e 2019 en municipios de menos de 20.000 habitantes de Andalucía, Aragón, Castela e León, Castela-A Mancha, Estremadura, Galicia e A Rioxa para coñecer a situación da violencia de xénero no ámbito rural e que foi o primeiro destas características que se realizou.

Fademur realizou tres tipos de enquisas a mulleres residentes no ámbito rural e profesionais que traballan con vítimas de violencia de xénero, así como 23 entrevistas en profundidade a persoas que sufriran esta clase de violencia.

Deste xeito, observouse que o 44% das residentes en rural enquisadas, a maior parte mulleres casadas de entre 40 e 59 anos, asumen en solitario as tarefas domésticas e que máis da metade actúan do mesmo xeito cos coidados. Aínda que menos do 34% destas persoas definen con exactitude que é a violencia de xénero, a maioría recoñecen o dano dentro da parella, polo que Rosa Arcos concluíu que se debe traballar na conceptualización para facilitar a súa detección.

TIPOS DE VIOLENCIA DE XÉNERO

O informe tamén mostrou que, para as mulleres, os tipos de violencia machista máis perceptibles son a psicolóxica (96%) e a física (92%), aínda que tamén a económica e a relacionada coa incapacidade de percibir axuda da administración. Tamén se identificaron outras "formas" de violencia contra as mulleres, como a realizada mediante as novas tecnoloxías.

Así mesmo, sinalou que o 60% das mulleres enquisadas "coñecen un caso de violencia de xénero próximo", uns datos "moito máis elevados" que os que mostran os procedementos. Por iso, concluíu que existen "un amplo número de casos" que non se plasman en denuncias ou accións penais e incidiu na necesidade de "ser capaces de achegarse" a esas vítimas.

A presidenta de Fademur Galicia tamén resaltou que o 56% das enquisadas percibe o ámbito do fogar como o espazo no que se produce a violencia de xénero, seguido pola contorna familiar e de amizade (35%) e o 061 e os centros de atención á muller como lugares nos que pedir axuda.

O estudo evidenciou ademais un descoñecemento de mecanismos de apoio ás vítimas, xa que o 54% das mulleres non coñece os seus dereitos en procesos xudiciais e o 50% descoñece ter dereitos a prestacións adicionais á consignada para mulleres que sufriron violencia machista. Esta situación leva, a xuízo da presidenta de Fademur Galicia, a que, en ocasións, non se execute a totalidade do orzamento destinado a axudas.

PERFIL DA VÍTIMA

Pola súa banda, as enquisas realizadas a profesionais que traballan con vítimas de violencia de xénero evidenciou que o 64,5% das atendidas teñen entre 30 e 50 anos e alertou dunha falta de atención especializada para os seus fillos. A idade media destas mulleres sitúase en 42,4 anos e a maior parte delas atópanse separadas ou en proceso de separación e contan con persoas a cargo, aínda que só o 40% están empregadas. Así mesmo, o estudo resaltou que as vítimas permaneceron en relacións de malos tratos una durante "unha media de 20 anos" antes de decidir deter esta situación.

Ademais, resaltouse a carencia de lugares acondicionados para atender a estas mulleres e a falta de accesibilidade dos dispoñibles, así como a presenza de "obstáculos" para a permanencia das vítimas no rural tras sufrir violencia de xénero.

Así, identificouse como "factor de risco vivir en contornas onde os modelos patriarcales están presentes", mentres o 80% das mulleres observa "un machismo xeralizado no rural". Rosa Arcos apuntou que as vítimas ven unha falta de "oportunidades para refacer a súa vida" no rural tras sufrir malos tratos e dificultades no cumprimento das ordes de afastamento debido á presenza de poucos recursos.